Ислам революциясы сақшылары корпусының (ИРСК) Әскери-теңіз күштері 29 қазанда Ормуз бұғазының батыс бөлігінде америкалық MQM-170 Outlaw ұшқышсыз ұшу аппаратын ұстап алып, оны Иран аумағына бүтін күйінде қондырғанын мәлімдеді. Иран тарапының айтуынша, радиоэлектрондық күрес бөлімшесі дронның басқару жүйелерін өз бақылауына алған. Мұның қашан болғанын ИРСК нақтыламады. АҚШ Қарулы күштерінің Орталық қолбасшылығы (CENTCOM) бұл хабарды жалған деп атады.
Tasnim агенттігі мен Иран мемлекеттік телеарнасы таратқан ИРСК мәлімдемесіне сәйкес, дрон Парсы шығанағы мен Ормуз бұғазы жағалауындағы Иранның әуе қорғанысы жүйелерін анықтауға жіберілген. Аппарат бортындағы деректерге қарағанда, ол шығанақтың оңтүстігіндегі елдердің бірінің жағалауынан ұшқан, бірақ қай ел екені айтылмады. Иран тарапы дронды ұстап алғанына дәлел келтірген жоқ, тәуелсіз дереккөздер де мұны растамады.
«Соңғы апталар мен айларда ИРСК шарасыздықтан бірнеше рет өтірік айтты, бүгін де солай», — деді CENTCOM ресми өкілі Тим Хокинс. Ол бұдан артық мәлімет берген жоқ.
MQM-170 Outlaw дронын америкалық Griffon Aerospace компаниясы шығарады. Бұл шағын ұшқышсыз аппаратты АҚШ Қарулы күштері 2004 жылдан бері, ең алдымен әуе қорғанысы есептоптарын жаттықтыруға арналған әуе нысанасы ретінде, сондай-ақ барлау мен бақылау үшін пайдаланып келеді. Иран осындай мәлімдемені 2011 жылы да жасаған еді: сол кезде ол RQ-170 Sentinel барлау дронына қарсы «электрондық тосқауыл» ұйымдастырғанын жариялаған. Ал америкалық ресми тұлғалар аппараттың жоғалуын техникалық ақаумен түсіндірген.
Сол күні Иран мемлекеттік телеарнасы ИРСК-ға сілтеме жасап, бір тәулікте үш мұнай танкері Ормуз бұғазынан келісілмеген бағытпен шығуға тырысқанда минаға соғылып, өртенгенін хабарлады. Иран ӘТК-нің айтуынша, кемелер радарлары мен навигациялық жүйелерін өшіріп, ескертулерге құлақ аспаған. Танкерлердің атауы мен зардап шеккендер туралы дерек келтірілмеді. Ұлыбританияның теңіз сауда операциялары орталығы (UKMTO) бұғазда жанып жатқан бір кемені көргенін ғана растады. Бұған дейін Ормуз бұғазында екі супертанкер минаға соғылған. Иран соғысқа дейін әлемдік мұнай тұтынудың шамамен бестен бірі өткен бұғаздағы кеме қатынасын бақылап отырғанын мәлімдейді.
Ормуз бұғазы АҚШ пен Иран арасындағы соғыстағы басты тартыс нүктесі болып қала береді. Тегеран бұған дейін Вашингтонға соғысты тоқтатудың алты шартын қойған, бірақ тараптар әзірге келісімге келе алмай отыр.
