Пәкістан мен Ауғанстан 27–28 қазанда ортақ шекарада бірнеше рет бір-біріне соққы берді, кемінде үш бейбіт тұрғын қаза тапты. 27 қазанның кешінде шайқас Пәкістанның Төменгі Оңтүстік Вазиристан округі мен Ауғанстанның Пактика провинциясындағы Бармаль уезі арасындағы Ангур-Адда шекара елді мекенінде басталып, таңға дейін жалғасты. 28 қазанда Ауғанстанның Нангархар провинциясындағы Торхам өткізу пунктінің маңында атыс болды. Жергілікті полицияның мәліметінше, онда екі бала қаза тапқан.
Пәкістан билігінің айтуынша, 27 қазанда жергілікті уақытпен сағат 17:00 шамасында ауған күштері Ангур-Адданың тұрғын үйлері мен базарын миномет пен артиллериядан атқылаған. Миномет снаряды үйге түсіп, бір бейбіт тұрғын қаза тапты, бір отбасының бес мүшесі жараланды, бірнеше адамның жағдайы ауыр. Базардағы дүкендер өртенді. Округ полициясының басшысы Исрар Ахмед шекарашылар жауап ретінде оқ атқанын мәлімдеді. Хайбер-Пахтунхва провинциясының губернаторы Фейсал Карим Кунди атқылауды ел егемендігін бұзу деп атады. Ауғанстан Қорғаныс министрлігі керісінше шабуылды пәкістандық тарап бастағанын, ауған күштері тек жауап бергенін айтады.
28 қазанда Нангархар полициясының өкілі Сайед Тайеб Хаммад AFP агенттігіне Торхам маңында пәкістандық шекарашылардың оғынан екі бала қаза тауып, тағы екі бейбіт тұрғын жараланғанын хабарлады. Аты-жөнін жариялауды сұраған екі пәкістандық шенеунік агенттікке бұл аймақта үш күннен бері атыс болмағанын айтқан. Ауғанстан Қорғаныс министрлігі сол күні Пәкістанды Пактикадағы шекара бекетіне және маңайдағы қауіпсіздік нысандарына төрт рет дрон соққысын жасады деп айыптап, жауап соққыларынан пәкістандық әскерилер арасында шығын бар екенін мәлімдеді. Екі тараптағы әскери шығын туралы деректі тәуелсіз дереккөздер растаған жоқ.
Исламабад пен 2021 жылы Кабулда билікке келген талибтер арасындағы қарым-қатынас 2025 жылғы қазандағы шекара қақтығыстарынан кейін күрт нашарлады. Сол кезде өткізу пункттері толықтай дерлік жабылды. Делдалдықтан кейін шайқас басылғанымен, 2026 жылғы ақпанда қайта басталды, Пәкістан көршісіне «ашық соғыс» жариялады. Содан бері Пәкістан авиациясы Ауғанстан аумағына, оның ішінде Кабулға бірнеше рет соққы берді. Исламабад талибтерді ондаған жылдан бері Пәкістан аумағына шабуыл жасап келе жатқан «Техрик-е Талибан Пәкістан» содырларын паналатады деп айыптайды. Кабул мұны жоққа шығарады. БҰҰ дерегінше, соңғы 12 айда Ауғанстанда соғыс қимылдары мен Пәкістан соққыларынан 512 бейбіт тұрғын қаза тапқан.
