26 қазан күні кешке Ресей әскері Харьковты реактивті снарядтармен атқылады. Харьков – Украинаның солтүстік-шығысындағы, Ресей шекарасынан шамамен 30 шақырым жерде орналасқан елдің екінші ірі қаласы. Соққы қаланың батысындағы Новобаварский тұрғын ауданына тиді. Харьков облыстық әскери әкімшілігінің басшысы Олег Синегубовтың хабарлауынша, екі ер адам қаза тауып, тағы төрт адам жараланды, олардың арасында 17 жастағы қыз бар. Облыстық прокуратураның мәліметінше, басқыншылар «Торнадо-С» көп зарядты реактивті атыс жүйесін қолданған.
Суспильне тілшілері алғашқы жарылыстарды Киев уақытымен шамамен 18:00-де (Астана уақытымен 21:00-де) естіген, кемінде бес жарылыс қатарынан болған. Біраз уақыттан кейін Украина Қарулы күштерінің Әуе күштері Ресейдің Белгород облысы жағынан Харьковқа қарай жылдам нысана ұшып келе жатқанын хабарлады. Харьков мэрі Игорь Терехов алдымен Холодногорский ауданына соққы тигенін, кейін Новобаварский ауданына үш рет соққы түсіп, қаза тапқандар бар екенін айтты. «Торнадо-С» – алысқа ататын басқарылатын снарядтар шығаратын ресейлік көп зарядты реактивті атыс жүйесі. Харьков шекараға тым жақын болғандықтан, мұндай снарядтар қалаға бірнеше минутта жетеді.
Синегубов алғашында бір адамның қаза тапқанын және 17 жастағы қыздың жараланғанын хабарлаған еді. Кейін құрбандар саны өсті. Оның соңғы мәліметі бойынша, екі адам қаза тауып, төрт адам жараланды: 61 және 77 жастағы ер адамдар, 60 жастағы әйел және 17 жастағы қыз. Олардың бәріне медициналық көмек көрсетіліп жатыр. Облыс әкімшілігі басшысының айтуынша, ер адамдардың бірі мен қыз қатты күйзеліске ұшыраған. Билік қаза тапқандардың есімін атаған жоқ.
Синегубовтың дерегінше, төрт көпқабатты үй, төрт жеке үй, 10 гараж және балабақша ғимараты зақымданды. Екі көлік пен тұрғын емес ғимарат өртенді, өртті Төтенше жағдайлар қызметінің құтқарушылары сөндірді. Соққы болған жерде салдарды жою жұмыстары жүріп жатыр.
Харьков облыстық прокуратурасы адам өліміне әкеп соққан соғыс заңдары мен әдет-ғұрыптарын бұзу бабы бойынша сотқа дейінгі тергеу бастады. Бұл – Украина Қылмыстық кодексінің 438-бабының 2-бөлігі. Украинада Ресей әскерінің бейбіт тұрғындарға қарсы әскери қылмыстары осы баппен саралануда.
Соңғы күндері Новобаварский ауданына соққы бірінші рет беріліп отырған жоқ. Украинаның «Зеркало недели» басылымының жазуынша, бір күн бұрын Ресей Харьковқа, соның ішінде осы ауданға жаппай шабуыл жасап, «Эпицентр» сауда орталығын қиратқан. Өткен аптада Харьковқа жасалған түнгі дрон шабуылы кезінде өрт сөндіріп жатқан құтқарушылар қайталама соққыға ұшырады.
Соғыстың алғашқы күндерінен бері Харьков ресейлік лаңкестіктің басты нысаналарының бірі болып келеді: қаланы зымырандармен, басқарылатын авиабомбалармен және дрондармен атқылап жатыр. Синегубовтың мәліметінше, өткен аптада Харьков облысында ресейлік атқылаулардан 12 адам, оның ішінде екі бала қаза тауып, тағы 148 адам жараланды.
