130-дан астам белсенді теннисші, бұрынғы ойыншылар және 20-ға жуық ұлттық федерация ерлер кәсіпқой турын басқаратын ATP ұйымының директорлар кеңесі мен басшылығына ашық хат жолдады. Олар 2028 жылдан бастап жұптық сайысты қысқарту жоспарынан бас тартуды сұрайды. Хат 26 қазанда жарияланды. Бұл ATP тур реформасы бойынша шешім қабылдайтын Туриндегі жыл қорытындысы кездесулеріне бірнеше апта қалғанда болды.
Талқыланып жатқан ұсыныстарға сәйкес, Үлкен дулыға турнирлерінен кейінгі ең беделді «Мастерс» (Masters 1000) сериясындағы жарыстарда негізгі торға қатысатын жұптар саны 32-ден 16-ға дейін, ал ATP 500 және ATP 250 санатындағы турнирлерде сегізге дейін азаяды. Жалпы жүлде қорындағы жұптық сайыстың үлесі 20 пайыздан 10 пайызға дейін төмендеуі мүмкін.
Хат авторларының есебінше, мұндай өзгерістен кейін жұптық сайыстан жеке сайысқа шамамен 20 млн доллар өтеді, ал жұпта ойнайтын мамандарға мансап құру әлдеқайда қиындайды. Хатқа қол қойғандар турға реформа керек екенін мойындайды. Бірақ олардың пікірінше, ойыншыларға даму жолы қажет, ал спорт бір топ жұлдызға ғана сүйеніп тұра алмайды. Науқанды бастағандардың бірі — 2025 жылы Уимблдонда аралас жұп сайысында чемпион атанған нидерландтық Сем Вербек.
ATP басшысы Андреа Гауденци бұған дейін жұптық сайыс «турдың негізгі бөлігі болып қала береді» деп мәлімдеген. Оның айтуынша, форматтарды қайта қарау бұл сайыстың тұрақты болашағын қамтамасыз етуге бағытталған. ATP торлар қысқарғаннан кейін босайтын қаржы ойыншыларда қалатынын нақтылады: ол жеке турнирлердің іріктеу кезеңі мен алғашқы айналымдарының жүлде қорына жұмсалады. Талқылау Ойыншылар кеңесімен жалғасады.
Жұптық сайысты қысқарту — ATP қазан айының ортасында таныстырған ауқымды реформаның бір бөлігі. Ұйым 2028 жылдан бастап Үлкен дулыға турнирлерінен тыс ойыншыларға төленетін жалпы соманы жылына 350 млн долларға жеткізуге, ал ең ірі турнирлерге қатысатындарға арналған бонус қорын 21,5 млн доллардан 50 млн долларға дейін ұлғайтуға уәде береді. Турнирлерді санатына қарай жеке апталарға топтастыру, ATP 250 деңгейіндегі жарыстар санын азайту жоспарланған. Ірі турнирлердегі нәтижелер көбірек ескерілуі үшін ATP рейтингіндегі ұпай есептеу жүйесі де өзгереді. Күнтізбеде Сауд Арабиясында өтетін оныншы «Мастерс» пайда болады.
