Ресейдің реактивті дроны Украинаның орталық-шығысындағы ірі қала Днепрдің теміржол вокзалына соққы беруінен қаза тапқандар саны 15-ке жетті. 30 қазанда таңертең 40 жастағы ер адам ауыр жарақаттан ауруханада көз жұмды. Бұл туралы Днепропетровск облыстық әскери әкімшілігі хабарлады. Әкімшіліктің айтуынша, дәрігерлер оның өмірі үшін күрескенімен, жарақаты тым ауыр болған. 30 қазанда Днепрде аза тұту күні жарияланды.
Ресей вокзалға 29 қазанда Киев уақытымен сағат 11:00 шамасында (Астана уақытымен 14:00-де) соққы берді. Реактивті ұшқышсыз аппарат Днепр – Запорожье бағытындағы № 866 қала маңындағы электр пойызы тұрған перронға құлады. Соққыдан кейін бірден билік 13 адамның қаза тапқанын хабарлады, екі сағаттан соң бұл сан 14-ке жетті. airpress.kz вокзалға жасалған соққы туралы 29 қазанда жазған болатын.
Облыстық әскери әкімшіліктің 30 қазандағы таңғы мәліметінше, Днепр ауруханаларында 11 жаралы жатыр, оның алтауының жағдайы ауыр. Ауыр жараланғандардың арасында 11 жастағы ұл бала бар. Зардап шеккендердің бәрі көптеген жарықшақтан жарақат алған. Билік қаза тапқандардың есімдерін әзірге атаған жоқ.
«Укрзализныця» компаниясы бұған дейін соққы алдында пойыздар қозғалысы тоқтатылып, электр пойызының жолаушылары эвакуацияланғанын хабарлаған еді. Соққыға дейін он минуттан астам уақыт қалған. Алайда дрон құлаған сәтте көп адам әлі пойыздың жанында жүрген.
Днепрдегі аза тұту күні вокзалда қаза тапқандарды және соңғы бір айда Ресей соққыларынан көз жұмған қаланың тағы тоғыз тұрғынын еске алуға арналған. Қалаға соққылар толастар емес: 29 қазанда кешке, вокзалдағы қасіреттен кейін, Ресей дроны кәсіптік училище жатақханасына тиді, ал энергетика желілеріне жасалған шабуыл салдарынан Днепр мен оның маңындағы 350 мыңнан астам абонент жарықсыз қалды.
Жолаушылары бар қала маңындағы пойыз тұрған вокзалға соққы беру – бейбіт адамдарға қарсы жасалған лаңкестік шабуыл әрі әскери қылмыс: халықаралық гуманитарлық құқық бейбіт тұрғындар мен азаматтық көлікке соққы беруге тыйым салады. Бұл соғыс басталғаннан бері Украина теміржолына жасалған ең қанды соққылардың бірі. 2022 жылғы сәуірде Ресей зымыраны Краматорск вокзалында 61 адамның өмірін қиған, ал 2022 жылғы тамызда Днепропетровск облысындағы Чаплино станциясына жасалған соққыдан 25 адам қаза тапқан.
