Microsoft соңғы тоғыз жылдағы ең ірі облигация шығарылымын бастады. Bloomberg пен CNBC хабарлауынша, компания АҚШ инвесторларынан кемінде 25 млрд доллар қарыз алмақ. Microsoft америкалық қарыз нарығына 2017 жылдан бері алғаш рет шығып отыр: сол жолы компания 17 млрд доллар тартқан еді. Бұл қарыз жасанды интеллектке қажет есептеу қуаты үшін бәсеке қызып тұрған шаққа тап келді.
Облигация – қарыздық бағалы қағаз: инвестор компанияға ақшасын қарызға беріп, оның пайызын алады. Microsoft мерзімі 2 жылдан 40 жылға дейінгі он шығарылымға дейін ұсынып отыр. Түпкі көлемі әлі белгіленген жоқ, ол сұранысқа байланысты болады. Орналастыруды Wells Fargo, JPMorgan Chase және UBS банктері ұйымдастырады. CNBC деректеріне қарағанда, мәміле бойынша есеп айырысу 4 қарашада күтіледі.
Ресми түрде қаражат жалпы корпоративтік мақсаттарға, соның ішінде күрделі шығынға, яғни ғимарат пен жабдыққа салынатын қаржыға жұмсалады. CNBC келтірген басшылық бағасы бойынша, Microsoft-тың мұндай шығыны 2026 жылы шамамен 170 млрд доллар болады. Компанияның есептеу қуатына негізгі сұранысты Anthropic, OpenAI және басқа клиенттер тудырып отыр. Қаржы директоры Эми Худ тоқсандық есептен кейін компания қосымша қаражатты «тиімді деп санаған кезде» тартатынын айтқан.
Microsoft жеңілдікті шартпен қарыз ала алады: компанияда Moody’s пен S&P Global агенттіктерінің екеуі де берген ең жоғары AAA кредиттік рейтингі бар. АҚШ-тың жария компаниялары арасында екі агенттіктен де осындай рейтинг алған тағы бір ғана компания бар – Johnson & Johnson. Нарық Microsoft тәуекелін бәсекелестерінен әлдеқайда төмен бағалайды: оның қарызын бес жылға дефолттан сақтандыру жылына шамамен 0,54% тұрады, ал Meta қарызы үшін бұл көрсеткіш шамамен 1,16%-ға жетеді.
ЖИ үшін қарыз алып жатқан жалғыз Microsoft емес. Bloomberg есебінше, ірі бұлтты компаниялар мен деректер орталықтарын салушылар жыл басынан бері облигация арқылы 313 млрд доллардан астам қаржы тартқан. Бұл 2025 жылғы жалпы көрсеткіштен үш есеге жуық көп. Тамызда Alphabet те 25 млрд долларлық бағалы қағаз орналастырды, Meta 95 млрд долларлық акция сатпақ, ал SpaceX ЖИ чиптері үшін 40 млрд доллар қарыз тартты.
Орналастыру алдында, 28 қазанда, Microsoft шілде–қыркүйек айларындағы қаржылық қорытындысын жариялады. Компанияның түсімі 19%-ға өсіп, рекордтық 92,3 млрд долларға жетті, ал операциялық пайдасы 21%-ға артып, 45,9 млрд доллар болды. Microsoft Azure бұлтты платформасының түсімін алғаш рет доллармен атады: тоқсанына 33,2 млрд доллар. OpenAI-мен жасалған коммерциялық келісімдерден компания 10 млрд доллар тапқан.
