Илон Масктың SpaceX компаниясы графикалық процессорлар (GPU) сатып алу үшін 40 млрд доллар қарыз қаржыландыру тарту туралы мәмілені жапты. GPU – жасанды интеллект жүйелерін оқытып, іске қосатын чиптер. Бұл туралы Маск 25 қазанда, жексенбі күні, X әлеуметтік желісінде жазды. Мәміле ЖИ саласындағы ең ірі қарыз келісімдерінің бірі саналады және есептеу қуаттары үшін бәсеке қаншалықты қымбатқа түсетінін тағы бір көрсетіп отыр.
Масктың сөзінше, бұл «негізінен мерзімінен бұрын өтеуге болатын қарыз, ол бірінші және екінші тоқсанда келетін GPU-ларды сатып алуға жұмсалады». Оның нақтылауынша, мәміле ағымдағы тоқсанның көрсеткіштеріне айтарлықтай әсер етпейді. Компания пайыздық мөлшерлемені, өтеу мерзімін және кредиторлардың тізімін жария еткен жоқ. Reuters агенттігі қазан айының басында SpaceX банктермен және активтерді басқаратын компаниялармен Nvidia-ның ЖИ чиптерін сатып алуға 40 млрд доллар тарту жөнінде келіссөз жүргізіп жатқанын хабарлаған.
Маск қаржыға қол жеткізудің себебін SpaceX-тің инвестициялық деңгейдегі кредиттік рейтингімен, сондай-ақ Starlink спутниктік интернеті мен ұшыру қызметтерінен түсетін табыспен түсіндірді. Сонымен бірге ол ЖИ деректер орталықтарынан басқа айтарлықтай табысы жоқ компаниялар үшін қарыз нарығы «толығымен дерлік жабылғанын» ескертті. Маск неоклаудтар деп аталатын компаниялар арасында бірігу мен банкроттық толқыны басталады деп болжады. Бұл – CoreWeave және Nebius сияқты деректер орталықтарын салып, есептеу қуатын жалға беретін компаниялар. Оның айтуынша, SpaceX мұндай компанияларды сатып алмайды, ол бұл идеяны «мағынасыз» деп атады. Reuters атап өткендей, кейбір инвесторлар қарызға салынған нысандар өзін ақтамайды деп қауіптеніп, америкалық неоклаудтардың акциялары арзандайды деп бәс тігіп жатыр.
Мәміле SpaceX-тің ЖИ бизнесі жылдам өсіп жатқан тұсқа тап келді. Үшінші тоқсанда компанияның түсімі бір жылда 161%-ға өсіп, 14,58 млрд долларға жетті, ал ЖИ-ден түскен табыс он есеге жуық артып, 7,56 млрд доллар болды. Күрделі шығындар үш есеге жуық өсіп, 19,6 млрд долларға жетті. Қаржы директоры Брет Джонсен төртінші тоқсанда бұл шығын 35–40 млрд доллар болады деп күтеді.
SpaceX-те ЖИ бағыты Маск SpaceX пен Grok чат-ботын әзірлеген xAI компаниясын біріктіргеннен кейін пайда болды. Сонымен қатар SpaceX пен Tesla Остинде Terafab атты бірлескен микросхема зауытын салып жатыр. Онда алғашқы сынақ чипі 2027 жылдың мамыр–маусым айларында шығады, ал жаппай өндіріс 2028 жылдың үшінші тоқсанында басталады деп күтілуде. SpaceX биржаға шықпай тұрып-ақ өз GPU-ларын өндіруді күрделі шығындардың ірі баптарының қатарына енгізген.
