Астанада 24 қазанда UNI FOOTBALL LEAGUE инклюзивті лигасының екінші республикалық турнирі өтті. Қажымұқан Мұңайтпасов атындағы Орталық стадионға Қазақстанның он қаласынан аутизм, Даун синдромы, церебралды сал ауруы және дамуында өзге де ерекшеліктері бар 90-ға жуық бала жиналды.
Турнирге Астана, Алматы, Ақтөбе, Атырау, Қарағанды, Петропавл, Семей, Тараз, Өскемен және Шымкент командалары қатысты. Барлығы 6+1 форматында 20 матч өтті: әр команда 15 минуттан төрт ойын ойнады. Орындар анықталған жоқ, медаль барлық қатысушыға табысталды.
Лиганы 2023 жылдан бері Bolashak Charity қоғамдық қоры Қазақстан Футбол Федерациясымен (ҚФФ) бірге дамытып келеді. Қазір лигада тоғыз қаладағы 120-ға жуық бала мен жасөспірім аптасына екі рет жаттығады. Өткен бір жылда 682 жаттығу өтті. Балалармен UEFA-ның B, C және D санатты лицензиясы бар бапкерлер жұмыс істейді.
Көктемде UEFA жобаны Grassroots Awards 2025/26 сыйлығының «Мүмкіндігі шектеулі жандарға арналған үздік бастама» номинациясында қола жүлдемен марапаттады. Бұл номинацияда алтын Украинаның «Ліга Дужих» жобасына бұйырды.
2026 жылы лига бапкерлеріне екі күндік республикалық семинар ұйымдастырылды. Онда бейімделген дене шынықтыру, балалардың эмоциялық күйімен жұмыс, балаларды қорғау және алғашқы медициналық көмек мәселелері қаралды. «Қызылжар» мен «Атырау» футболшылары қатысушыларға шеберлік сыныбын өткізді, лига «Қызылжармен» ынтымақтастық туралы меморандумға қол қойды. Тағы 40 жас ойыншы Астана, Семей және Өскемен арасындағы өңіраралық жолдастық кездесулерде ойнады.
«Біздің мақсатымыз – балаларды футбол ойнауға үйрету ғана емес, диагноз олардың мүмкіндігін айқындамайтынын көрсету», – деді UNI FOOTBALL LEAGUE жетекшісі Шыңғыс Темерханов.
Жобаның бас демеушісі – Freedom Holding Corp. Компания қолдауды Freedom Shapagat корпоративтік қоры арқылы көрсетеді.
