Ұлттық әуе тасымалдаушысы Air Astana мен қытайлық China Southern Airlines 30 қазанда стратегиялық серіктестік туралы келісімге қол қойды. Екі елдің әуе компаниялары арасында мұндай келісім алғаш рет жасалып отыр, деп хабарлады ҚР Көлік министрлігі.
Тасымалдаушылар рейстер кестесін үйлестіреді, код-шерингті, яғни серіктестің рейсіне өз кодымен билет сатуды кеңейтеді және бірлескен маркетингтік акциялар өткізеді. Air Astana мен China Southern код-шеринг бойынша бұған дейін де жұмыс істеп келген. Жаңа келісім бұл ынтымақтастықты стратегиялық серіктестік деңгейіне көтереді. Министрлік мұның іссапарға, демалысқа, оқуға және туыстарына баратын жолаушыларға, сондай-ақ екі ел арқылы транзитпен ұшатындарға тиімді болатынын айтады.
Құжатқа Air Astana-ның серіктестік және альянстар жөніндегі вице-президенті Ричард Леджер мен China Southern Airlines атқарушы вице-президенті Цзэн Юнчао қол қойды. Рәсімге ҚР Көлік вице-министрі Талғат Ластаев қатысты.
Ластаевтың айтуынша, Қазақстан мен Қытай арасындағы рейстер саны 2025 жылдың осы кезеңімен салыстырғанда 52%-ға өскен. 2026 жылдың басынан бері бұл бағыттарда 1 миллионнан астам жолаушы тасымалданды. Министрлік Қытайға ұшатын бағыттар санын 30-ға жеткізуді жоспарлап отыр.
Air Astana қазір Астана мен Алматыдан Үрімжі, Пекин, Гуанчжоу және Шанхайға ұшады. Қарбалас маусымда бұл бағыттарда аптасына 36 рейске дейін (барып-қайту) орындалады. China Southern Үрімжі, Пекин, Гуанчжоу және Сианьнан Алматы мен Астанаға аптасына 29 рейске дейін жасайды.
China Southern Airlines — Қытайдың ең ірі әуе компанияларының бірі, штаб-пәтері Гуанчжоуда орналасқан. 2026 жылдың ортасында оның паркінде 973 жолаушы және жүк ұшағы болған. Алматыдан қыста тікелей ұшатын бағыттар, соның ішінде Гуанчжоу туралы airpress.kz ыңғайлы бағыттарға шолуда жазған.
