Ресей әскері 11 қарашада күндіз Черноморск қаласының орталығындағы базарға соққы берді. Черноморск — Қара теңіз жағалауындағы порт қаласы, Одессадан оңтүстікке қарай шамамен 20 шақырым жерде орналасқан. Одесса облыстық әскери әкімшілігінің басшысы Олег Кипердің хабарлауынша, үш адам қаза тауып, тағы 11 адам жараланды. Бұл — бейбіт тұрғындарға жасалған лаңкестік шабуыл: Кипердің сөзінше, соққы базарда «әрдайым адам көп болатын» уақытта тиді.
Облыс басшысы «Ранок» базарына соққы туралы алғашқы хабарды Киев уақытымен сағат 12:31-де (Астана уақытымен 15:31-де) жариялады. Одан сәл бұрын Украина Әуе күштері Черноморскіге қарай реактивті дрон ұшып бара жатқанын ескерткен.
Алғашында билік бір адам қаза тауып, төрт адам жараланғанын айтқан. Бір сағаттан кейін зардап шеккендер саны 11-ге жетті: тоғыз адам ауруханаға жеткізілді, олардың төртеуінің жағдайы ауыр, тағы біреуіне орнында көмек көрсетілді. Кейін ауыр жараланған екі адам ауруханада көз жұмып, қаза тапқандар саны үшеуге жетті. Билік олардың есімдерін әлі атаған жоқ.
Жарылыстан сауда павильондары, базар маңындағы тұрғын үйлер, бір жеке үй және тұрақта тұрған көліктер зақымданды. Базар аумағында өрт шықты — ТЖМҚ құтқарушылары оны тез сөндіріп, өрттің әрі қарай таралуына жол бермеді. Оқиға орнында үйінділерді тазалау жұмысы тағы бірнеше сағатқа созылды.
Одесса облыстық әскери әкімшілігінің мәліметінше, полиция шабуылды әскери қылмыс ретінде құжаттап жатыр.
Черноморск — Украина астық экспорттайтын Одесса облысындағы үш ірі порттың бірі, Ресей оны жиі атқылайды. 9 қарашада Ресей дроны қаладағы бір жеке үйге тиді, ал 11 қарашаға қараған түні Ресей әскері облыстың энергетика нысандарына шабуыл жасап, 135 мың тұтынушы жарықсыз қалды. 2025 жылғы қарашада Ресейдің дәл осы базарға берген соққысынан екі адам қаза тапқан.
