Қазақстанда электромобильдерге арналған жеке мемлекеттік нөмірлер пайда болады: оларда өңір коды жазылатын өріс жасыл түсті болады. ІІМ нөмірлердің жаңа үлгілерін 3 қарашадағы № 831 бұйрықпен бекітті, өзгерістердің негізгі бөлігі 2027 жылғы 1 қаңтардан бастап күшіне енеді. Жаңа нөмірлер жеке адамдар мен компанияларға тиесілі жеңіл және жүк электромобильдеріне, электробустар мен электр мотоциклдеріне қатысты.
Электромобильдің қарапайым нөмірі бұрынғыдай ақ түсті болып қалады: онда Қазақстан туы, қара цифрлар, әріптер мен KZ белгісі бар, тек өңір коды көрсетілетін өріс жасыл түске боялады. Полицияның арнаулы және жедел қызметтерінің электромобильдері де жасыл өріс алады, бірақ олардың нөмірі көк, таңбалары ақ түсті. Дипломаттар мен консулдық қызметкерлердің (D және T сериялары) нөмірі қызыл, шетелдіктер мен шетел қатысатын компаниялардікі сары түсті болады. Электр мотоциклдеріне және стандартты өлшемдегі нөмір сыймайтын көліктерге жеке нұсқалар қарастырылған.
Бұйрық кезең-кезеңімен күшіне енеді. Негізгі бөлігі 2027 жылғы 1 қаңтардан, ал жекелеген тармақтары ресми жарияланғаннан кейін он күн өткен соң, яғни 2026 жылғы 21 қарашада іске қосылады. Бұрын тіркелген электромобильдердің иелері нөмірін ауыстыруы керек деп құжатта айтылмаған.
Жасыл нөмір туралы ІІМ жазда-ақ айтқан еді. Сол кезде ішкі істер вице-министрі Санжар Әділов мұндай нөмірлерді бірден емес, шамамен жарты жылдан кейін бере бастайтынын түсіндірген: өндірушілерге шығаруды қайта реттеуге уақыт керек. Оның айтуынша, бұған бюджеттен қаржы жұмсалмайды, өйткені тек нөмірдің түсі ғана өзгереді.
Жаңа бұйрыққа ішкі істер министрі Ержан Сәденов қол қойған. Құжат ІІМ 2015 жылы № 1040 бұйрықпен бекіткен мемлекеттік нөмірлердің нысандары мен үлгілерін толықтырады. Бұйрық Құқықтық ақпараттың бірыңғай жүйесінде жарияланды.
