Warner Bros. студиясы Том Хэнкс пен Мег Райан ойнаған 1998 жылғы «Вам письмо» (You’ve Got Mail) романтикалық комедиясының ремейкін әзірлеп жатыр, деп хабарлайды Deadline мен Variety. Жаңа нұсқаның режиссері — Джейсон Орли, сценарийді де ол қайта өңдеп жатыр.
Орли Дебора Каплан мен Гарри Элфонттың сценарийін негізге алады. Продюсерлері — «Форсаж» франшизасымен танымал Нил Мориц және Original Film компаниясынан Таня Ландау. Студия актерлерді әзірге атаған жоқ, түсірілім мерзімі мен шығу күні де хабарланбады.
Орли бұған дейін Big Time Adolescence (2019) және I Want You Back (2022) комедияларын түсірген. Жақында ол Amazon үшін Бри Ларсон, Джек Куэйд, Генри Голдинг және Лили Коллинз ойнаған Close Personal Friends комедиясының жұмысын аяқтады, оның шығу күні әлі жарияланған жоқ.
Түпнұсқа фильмді Нора Эфрон сіңлісі Делиямен бірге жазған сценарий бойынша түсірген. Хэнкс кітап супермаркеттері желісінің иесі Джо Фокстың, ал Райан шағын балалар кітап дүкенінің иесі Кэтлин Келлидің рөлін сомдады. Кейіпкерлер өмірде бәсекелес екенін білмей, электрондық хат алмасу арқылы бір-біріне ғашық болады. Сюжет Миклош Ласлоның «Парфюмерия» пьесасы мен соның желісімен Эрнст Любич 1940 жылы түсірген The Shop Around the Corner фильмінен бастау алады. Фильм 1998 жылғы желтоқсанда шығып, 65 млн доллар бюджетпен әлемдік прокатта 250 млн доллардан астам, яғни қазіргі бағам бойынша шамамен 111 млрд теңге жинады. Хэнкс пен Райан үшін «Вам письмо» Joe Versus the Volcano және Sleepless in Seattle фильмдерінен кейінгі үшінші ортақ жоба болды, соның екіншісін де Эфрон түсірген.
