Қазақстан 2026 жылғы орақ науқанының қорытындысы бойынша 24,3 млн тонна астық жинады. Бұл туралы Ауыл шаруашылығы министрлігі хабарлады. Бұл – соңғы 15 жылдағы ең жоғары көрсеткіштердің бірі: елде одан көп өнім тек екі рекордтық жылда жиналған.
Алдын ала деректерге сәйкес, элеваторларға түскен жұмсақ бидайдың шамамен 72%-ы үшінші сыныпқа жатады. Сынамалардың 48%-ында желімтік мөлшері 28%-дан асады. Сапа жағынан Ақмола облысы алда тұр: мұнда үшінші сыныпты бидайдың үлесі 90%-ға, ақуызы жоғары Hi-Pro санатының үлесі 70%-ға жетті.
Жаңа астықтың экспорты да қарқын алды. «Қазақстан темір жолы» ҰК» АҚ дерегінше, қыркүйектен 19 қазанға дейін шетелге 1,657 млн тонна астық жөнелтілді, өсім – 9%. Соңғы екі маркетингтік жылда Қазақстан астық баламасында 15,5 млн және 16 млн тонна астық пен ұн экспорттады. Бұл – тәуелсіздік жылдарындағы рекорд.
Министрлік мол өнімді егістікке салынған қаражаттың артуымен де байланыстырады. Минералды тыңайтқыш енгізу көлемі үш жылда үш есеге жуық өсіп, 2025 жылы 1,8 млн тоннаға жетті. Биыл 2,3 млн тонна жоспардың 2,1 млн тоннасы енгізіліп қойды. Элиталық тұқымдардың үлесі 12%-ға көтерілді.
Орақ науқанына 130 мыңнан астам трактор, 29 мың астық жинайтын комбайн, 17 мың жатка және 130 мыңға жуық басқа техника жұмылдырылды. 2023–2025 жылдары ауыл шаруашылығы техникасының тозуы 85%-дан 65%-ға дейін төмендеді, 2026 жылы техника паркін 8% жаңарту көзделген. Жеңілдетілген лизинг бағдарламасы арқылы диқандар 12,7 мыңнан астам трактор мен 2 340 комбайн сатып алды. Бұл – елдегі трактор мен комбайн паркінің 10%-ға жуығы.
Министрлік науқан барысын кезең-кезеңімен жариялап отырды: аралық кезеңде егістіктің 81,5%-ы орылғанда бастырылған астық көлемі 18,6 млн тоннаны құраған еді.
