Қазақстан құрамасының қақпашысы Стас Покатилов өнер көрсететін бакулік «Сабах» маусымдағы алғашқы жеңілісіне ұшырады. Әзербайжан премьер-лигасының 10-турында команда «Товуз Сити» стадионында «Туран-Товузға» 2:3 есебімен есе жіберді. Покатилов негізгі құрамда капитан ретінде шығып, ойынның басынан аяғына дейін алаңда болды.
Алаң иелері бірінші таймда екі минут ішінде екі гол соқты: 28-минутта Энрике Силва, 30-минутта Жо Батишта көзге түсті. 67-минутта Батишта екінші голын соғып, есепті 3:0-ге жеткізді. «Сабах» екі гол соғып жауап берді — 70-минутта Джой-Лэнс Миккелс, 87-минутта Ксандер Северина қақпаны дәл көздеді, бірақ тең ойынға уақыт жетпеді.
Бұл кездесуге дейін «Сабах» чемпионатта сегіз матч өткізіп, бірде-бір рет жеңілмеген еді: алты жеңіс пен екі тең ойынның арқасында команда 20 ұпай жинаған. «Туран-Товуз» жеңістен кейін 18 ұпай жинап, көшбасшыдан екі ұпай ғана қалып отыр.
«Сабах» — Әзербайжанның ағымдағы чемпионы. Өткен маусымда Покатилов ойнайтын команда ел чемпионатын жеңіп алып, «Қарабақтың» үстемдігін тоқтатты. Биыл күзде бакулік клуб тарихында тұңғыш рет Чемпиондар лигасының негізгі кезеңінде ойнап жүр. Прагалық «Славияны» жеңген ойыннан кейін УЕФА Покатиловты турдың символдық құрамасына енгізді, ал 20 қазанда команда Дортмундтың «Боруссиясына» 1:2 есебімен жеңілді. «Сабах» жалпы кезеңдегі келесі матчын 4 қарашада Норвегияның «Викинг» клубымен қонақта өткізеді.
