«ҚазАгроҚаржы» АҚ ауыл шаруашылығы техникасын жеңілдетілген лизингке берудің үш бағдарламасы — «Өз жемі-шөбіміз», «Жеңілдікті лизинг 6%» және «Қазақстанда жасалған» бойынша өтінім қабылдауды қайта бастады, деп хабарлады Ауыл шаруашылығы министрлігі. Үш бағдарламада да мөлшерлеме жылдық 6%, қаржыландыру мерзімі 10 жылға дейін.
«Жеңілдікті лизинг 6%» бағдарламасы отандық өндірістегі немесе отандық құрастырудағы өздігінен жүретін ауыл шаруашылығы техникасына арналған, ол бойынша алғашқы жарна талап етілмейді. «Қазақстанда жасалған» бағдарламасы бойынша ілмелі, тіркемелі және өздігінен жүретін техниканы, сондай-ақ ауыл шаруашылығы өнімін, балық өнімін және биологиялық активтерді тасымалдайтын көлікті алуға болады. Мұнда да техника тек Қазақстанда шығарылған немесе құрастырылған болуы керек, ал алғашқы жарна құнының 15%-ынан басталады.
«Өз жемі-шөбіміз» бағдарламасы мал шаруашылығымен айналысатындарға арналған: ол арқылы отандық та, шетелдік те ауыл шаруашылығы және жем-шөп дайындайтын техника, сондай-ақ жылжымалы суару жүйелері қаржыландырылады. Бағдарламаға мал өсіретін, ұстайтын немесе бордақылайтын, жайылымы не шабындығы бар және жем-шөп өндіретінін немесе дайындайтынын растай алатын шаруашылықтар қатыса алады. Алғашқы жарна кемінде 15% болады. Оның орнына алушы қарсы міндеттеме алады: қаржыландырылған жылдан кейінгі екі жыл ішінде еңбекақы қоры мен салық төлемдерін 10%-ға арттыруы тиіс.
Өтінім қабылдау 9 қарашада басталды. Кезекке «ҚазАгроҚаржының» Telegram-боты арқылы жазылуға болады, онлайн өтінімді компанияның ресми сайтында да беруге болады.
