Қазақстандық боксшы Армат Арманұлы орта салмақтағы WBA Asia чемпиондық белдеуін қорғап қалды. Ол 31 қазанда Ақтөбеде өткен кәсіпқой бокс кешінің басты жекпе-жегінде угандалық Шадири Бвогиді жоспарланған он раундтың сегізіншісінде техникалық нокаутпен жеңді.
Жекпе-жектің тағдыры сегізінші раундта шешілді: Бвоги екі рет нокдаунға түсті, содан кейін төреші жекпе-жекті тоқтатты. Арманұлы кәсіпқой рингтегі сегізінші жеңісіне жетті, оның есебінде бір ғана жеңіліс бар. Угандалық боксшы рингке 11 жеңіс пен бір жеңіліс рекордымен шыққан еді.
WBA Asia — кәсіпқой бокстағы төрт негізгі ұйымның бірі Дүниежүзілік бокс қауымдастығының (WBA) өңірлік титулы.
Ақтөбедегі кеш қазақстандық боксшылар үшін шығынсыз өтті: он жекпе-жектің бәрінде қазақстандықтар жеңді, оның жетеуі мерзімінен бұрын аяқталды. Қосалқы басты жекпе-жекте Саматали Тольтаев жеңіл салмақта WBA Asia белдеуін жеңіп алды. Ол бұрынғы WBA әлем чемпионы, панамалық Хесреэль Корралесті ұпай бойынша жеңді. Оның бауыры Санатали армениялық Петрос Ананянды төрешілердің бірауызды шешімімен ұтты. Қазақстандықтар өзбекстандық боксшылармен тағы төрт жекпе-жек өткізіп, бәрінде де жеңіске жетті.
Арманұлы алдыңғы жекпе-жегін шілдеде өткізіп, ресейлік Харон Запольскийді бесінші раундта нокаутқа түсірген. Ақтөбедегі кешпен бір күнде тағы бір қазақстандық — Бек Нұрмағанбет мексикалық қарсыласын нокаутқа түсірді. Ол Сауль «Канело» Альварестің шоуында рингке шықты.
