Алматының Алатау ауданында LRT алғашқы желісінің болашақ депосы салынатын алаңда жер жұмыстары жүріп жатыр. Шамамен 19 гектар учаске Фариза Оңғарсынова, Мөңке би және Бауыржан Момышұлы көшелерінің арасында орналасқан. Бұл туралы Алматы қаласын дамыту орталығы хабарлады.
Қазір нысанда топырақ төгіліп, тығыздалып жатыр. Жұмысқа 24 өзітүсіргіш, жеті экскаватор, алты тиегіш, төрт каток және екі су шашатын көлік тартылған. Орталық сарапшысы Нұрбол Әліповтің айтуынша, топырақ қабат-қабатымен төселеді, әр қабаттың сапасы тексеріледі.
Депо желідегі барлық құрамның базасы болады. Пойыздар осында рейс аралығында тұрып, тексеруден, техникалық қызмет көрсетуден және жөндеуден өтеді, содан кейін күн сайын бағытқа шығады.
Желі деподан Момышұлы көшесімен оңтүстікке қарай Төле би көшесіне дейін, одан әрі Төле бимен шығысқа қарай Абылай хан даңғылына дейін, кейін даңғылмен солтүстікке қарай Алматы-2 вокзалына дейін өтеді. Бірінші кезектің ұзындығы — 18,3 км, онда 34 аялдама қарастырылған. Бір пойыз шамамен 300 жолаушы тасымалдай алады.
Желіні 2027 жылдың соңында іске қосу жоспарланған. Қыркүйекте қалада алғашқы желінің рельстерін төсеу басталды, ал жоба бойынша құрылыс жұмыстары 2029 жылғы сәуірге дейін созылады. Құрылыс қала орталығындағы қозғалысқа да әсер етіп отыр: осы демалыс күндері Абылай хан даңғылында қозғалыс шектеледі. Жеңіл рельсті көлікті іске қосуға орай ІІМ LRT нысандарына арналған жеке полиция құрып жатыр.
