Кубада 2,7 миллионнан астам тұрғын электр жарығының сөнуі мен желілердегі апаттар салдарынан сумен жабдықтау іркілісіне тап болды. Бұл деректі елдің Ұлттық су ресурстары институты (INRH) келтірді. Жағдайды Гавананы сумен қамтитын негізгі көз – Куэнка-Сур магистральдық су құбырының жарылуы ушықтыра түсті: астананың үш муниципалитетіндегі 200 мыңнан астам тұрғын сусыз қалды.
INRH-тың сумен жабдықтау және кәріз кәсіпорындары тобы президентінің бірінші орынбасары Юниор Гонсалес мемлекеттік телеарнаға сөйлеген сөзінде Куэнка-Сурдағы апат судың берілуіне қатты әсер еткенін айтты. Ақау жөнделді, бірақ желінің жұмысын қалпына келтіруге тағы алты-жеті сағат кетті. Гаванадан бөлек, іркілістер аралдың батысындағы Пинар-дель-Рио мен Артемиса провинцияларында, сондай-ақ шығысындағы Гранма мен Ольгинде тіркеліп отыр.
INRH мәліметінше, елдегі сорғы станцияларының 85 пайыздан астамы ортақ энергия жүйесінен қуат алады. Жарық сөнгенде құбырлардағы қысым төмендейді, ал жөндеуден кейін су бірнеше сағаттан соң ғана беріледі. Институт қазан айында су тапшылығының 88 пайызы электр қуатының үзілуі мен сорғылардың бұзылуына, тек 4 пайызы құрғақшылыққа байланысты екенін хабарлаған. Зардап шеккендер саны мамыр айының соңынан бері іс жүзінде өзгерген жоқ: сол кезде де билік осыған жуық көрсеткішті атаған еді.
Үкімет желілерде 300-ден астам апаттық жұмыс жүргізіп, сорғы станцияларын қуаттандыру үшін күн панельдерін орнатып жатыр. Сусыз қалған аудандарға су автоцистерналармен жеткізіледі, алайда жеке тасымал тұрғындарға қымбатқа түседі: қыркүйекте Гаванада мың литр суды үйге жеткізу 10–15 мың песо тұрған.
Кубадағы энергетикалық дағдарыс 2024 жылдың ортасынан бері жалғасып келеді. Оны тозығы жеткен электр станцияларымен, отын тапшылығымен және экономикалық құлдыраумен байланыстырады. 2026 жылғы қаңтардан бастап жағдайды АҚШ-тың аралға мұнай жеткізуге қойған шектеулері, мамырдан бастап жаңа американдық санкциялар қиындата түсті. Куба Сыртқы істер министрі БҰҰ Бас Ассамблеясында бұл шараларды «энергетикалық қоршау» деп атады. Соңғы айларда елдің энергия жүйесі бірнеше рет толықтай істен шықты, ал ірі блэкауттардың бірінде шамамен 10 миллион адам жарықсыз қалды.
