Түркістан облысының Отырар ауданында мақта өңдейтін тағы екі зауыт іске қосылды. «Türkistan toqyma» ЖШС-ның кәсіпорындары «Тұран» арнайы экономикалық аймағында, Қараконыр ауылдық округіне қарасты Сырдария ауылында орналасқан. Бұл туралы Түркістан облысының әкімдігі хабарлады.
Енді компанияның мақта өңдейтін төрт зауыты бар, оның алғашқы екеуі 2025 жылы іске қосылған. Төрт зауыт жылына 320 мың тонна шитті мақтаны өңдеп, 110 мың тонна мақта талшығын шығаруға есептелген. Кәсіпорындарға салынған инвестицияның жалпы көлемі 17,129 млрд теңге болды.
Зауыттарда жергілікті тұрғындар үшін 100-ден астам тұрақты жұмыс орны ашылды. Өндіріс 76,2 гектар аумақты алып жатыр. Жабдықтар Қытайдан әкелінген: желілер шитті мақтаны қабылдап, тазалайды және кептіреді, талшықты тұқымнан ажыратады, дайын өнімді престеп, буып-түйеді.
Жаңа өндірісті іске қосу рәсіміне Түркістан облысының әкімі Нұралхан Көшеров қатысты. Оның айтуынша, бұл кәсіпорындар өңірде ауыл шаруашылығы өнімін терең өңдеу көлемін арттыруға және қосылған құны жоғары өнім шығаруға мүмкіндік береді.
Түркістан облысы – Қазақстанда мақта өсіретін негізгі өңір. Облыста мақта-тоқыма кластері қалыптасып келеді. Ол мақтаны өсіріп, жинаудан бастап иірілген жіп пен дайын тоқыма бұйымдарын шығаруға дейінгі бүкіл тізбекті қамтуы тиіс. Бұған дейін облыстың Мақтаарал ауданында мақта майын өндіретін зауыт іске қосылған еді.
