Мазмұнға өту

Netflix, Amazon және Fox 2030 жылғы әлем чемпионатына құқық үшін таласады

Медиа басшыларының бағалауынша, тендер жеңімпазы шамамен $1,5 млрд төлейді, ал Disney өзінің ESPN арнасымен бұл күреске қатыспады.

Президент ФИФА Джанни Инфантино на трибуне матча женского чемпионата мира U-20
Фото: AP

Netflix, Amazon, YouTube және Fox 2030 жылғы футболдан әлем чемпионатын АҚШ-та көрсету құқығына өтінім беріп жатыр. Ұсыныстарды қабылдау мерзімі 19 қарашада аяқталады. Бұл туралы дереккөздерге сілтеме жасап CNBC хабарлады. Телеарнаның мәліметінше, Disney өзінің ESPN спорт арнасымен бұл тендерге қатыспайды.

Қазір АҚШ-та мундиальды көрсету құқығы Fox пен NBCUniversal құрамындағы испан тілді Telemundo-да. ФИФА ағылшын және испан тілді хабарды бір сатып алушыға сатқысы келеді. Сауда қатысушылары Сауд Арабиясында өтетін 2034 жылғы әлем чемпионатына да таласа алады. Медиа басшыларының бағалауынша, жеңімпаз ұсыныс шамамен $1,5 млрд, яғни 673 млрд теңгеге жуық болады. Екі турнир бірге сатылса, сома одан да асуы мүмкін.

Көрерменді көбірек қамту үшін ФИФА дәстүрлі телеарна мен стриминг сервисінің бірлескен өтініміне де дайын. Ұйым стримингті матчтардың бір бөлігін тегін теледидарға қайта сатуға міндеттемейді — мұны жеңімпаздың өзі шешеді. ФИФА-да АҚШ-та Netflix немесе Amazon Prime Video жазылымы онсыз да жеткілікті адамда бар деп есептейді. Netflix америкалықтарға 2027 жылғы әйелдер арасындағы әлем чемпионатын көрсетеді, барлық матчты серіктессіз береді.

CNBC-дің мәліметінше, ESPN есеп-қисап жасап, $1,5 млрд-қа жете алмаған: арнаға НХЛ, MLB, АПЛ мен Чемпиондар лигасына ақша сақтау керек, бұл турнирлердің құқығы 2027 жылы ұзартылуы ықтимал. Skydance пен Apple де өтінім бермейді. NBCUniversal әлі шешім қабылдамады, сондықтан Telemundo 2030 жылғы әлем чемпионатынсыз қалуы мүмкін. ФИФА өкілі тендердің құпиялығын алға тартып, пікір білдіруден бас тартты.

Келесі аптада ФИФА басшылары сауда қатысушыларымен жеке кездесіп, мүмкін түпкілікті ұсыныстарды алу үшін АҚШ-қа барады. Жеңімпаз жыл соңына дейін анықталады. 2030 жылғы әлем чемпионаты Испания, Португалия және Мароккода өтеді. ФИФА-ның турнирге қатысты коммерциялық жоспарлары төңірегінде дау бар: жақында Чеферин мен ФИФА Кеңесіндегі еуропалықтар әлем чемпионатындағы үлесті сату туралы құжаттарды талап етті.

БөлісуTelegramWhatsAppVKFacebookX

Сондай-ақ оқыңыз