«Реал» жартылай қорғаушысы Орельен Тчуамени Франция құрамасының жиынынан кетіп, Ұлттар лигасында Италия және Түркиямен ойындарды өткізіп алады. Франция футбол федерациясының хабарлауынша, 26 жастағы ойыншыны оң аяғының шап бұлшықетіндегі жарақат қайта мазалап жүр. Бас бапкер Зинедин Зидан оның орнына ешкімді шақырмады.
Федерацияның мәліметінше, ауырсыну ойыншы дүйсенбі күні Клерфонтенге келген бетте басталған. Сейсенбі кешке құраманың дәрігерлері «Реалдың» медициналық штабымен кеңесіп, футболшының өз келісімімен оны клубына қайтаруды шешті. Тчуамени түнді командамен бірге өткізіп, сәрсенбіде Мадридке ұшады. Оның қанша уақыт ойнай алмайтыны айтылмады.
Бұл жарақат Тчуамениді 2026 жылғы әлем чемпионатында да мазалаған еді. Зидан тұсында ол Франция құрамасы үшін әлі бір де бір ойын өткізген жоқ: алдыңғы жиынды да денсаулығына байланысты өткізіп алды.
Бұл — Зиданның қарашадағы ойындар алдындағы төртінші шығыны. Бұған дейін жарақатқа байланысты Магнес Аклиуш, Пьер Калулу және Маркус Тюрам саптан шықты, олардың орнына құрамаға алғаш рет Пабло Пажис, Саэль Кумбеди және Эли Крупи шақырылды.
Франция 12 қарашада «Сан-Сиро» стадионында Италиямен қонақта ойнайды, ал 15 қарашада Бордода Түркияны қабылдайды. Астана уақытымен ойындар 13 және 16 қарашаға қараған түні өтеді.
