«Бавария» бас бапкері Венсан Компани науқастан кейін клубтың Зебенер-штрассе көшесіндегі жаттығу базасына оралды. Клубтың хабарлауынша, бельгиялық маман сауығып келеді және аптаның басынан бері базада жүр. Ол сонда иығындағы жарақаттан кейін оңалту курсынан да өтіп жатыр.
Мюнхеннің tz газетінің мәліметінше, сейсенбі күні таңғы сағат 10:00 шамасында Компани өз кабинетінде компьютер алдында жұмыс істеп отырған, сондай-ақ бірнеше медициналық тексеруден өткен. Команданың бұл күні жаттығуы болған жоқ.
Компанидің командамен жұмысқа қашан кірісетінін клуб атамай отыр. «Бавария» құрметті президенті Ули Хёнесс Bayerischer Rundfunk эфирінде бапкер ұлттық құрамалардың қарашадағы үзілісінен кейін оралуы мүмкін екенін айтты.
40 жастағы Компани 23 қазанда екінші команданың жаттығуын бақылап тұрғанда есінен танып, ауруханаға жеткізілген. Кейін спорт директоры Макс Эберль бұған ми қабықтарының тітіркенуі себеп болғанын хабарлады. 28 қазанда бапкер ауруханадан шығып, емделуін үйде жалғастырды.
Компани емделіп жүрген кезде команданы оның көмекшісі Аарон Дэнкс басқарды, «Бавария» бес ойынның бәрінде жеңіске жетті. Солардың қатарында Чемпиондар лигасында Мадридте «Атлетикомен» (2:0) және Бундеслигада «Майнцпен» (2:1) өткен кездесулер бар. «Винсті өз орнында қайта көргеніме қуанамын», — деп жазды Дэнкс Instagram-да.
