Қазақстандық балуан Алтын Шағаева Астанада өтіп жатқан күрестен әлем чемпионатында 59 келіге дейінгі салмақта жартылай финалға шықты. 29 қазанда ширек финалда ол польшалық Йовита Вжесеньді 5:1 есебімен жеңіп, әлем біріншілігінің финалына бір-ақ қадам қалды.
Жартылай финалда Шағаева үнділік Манишамен кездеседі. 59 келіге дейінгі салмақтағы финалға жолдама үшін белдесулер сол күні Астана уақытымен сағат 16:30-да басталады. Бұл салмақтағы финал мен қола жүлде үшін бәсекелер 30 қазанға белгіленген.
Жартылай финалға шығуы қазақстандық балуанға медаль алуға нақты мүмкіндік береді: жеңсе, кемінде күміс жүлдеге ие болады, ал жеңілсе, қола медаль үшін белдесуге шығады.
Ширек финалға дейін Шағаева салмақтағы ең мықты балуандардың бірін тоқтатты. 1/8 финалда ол түркиялық Бедиха Гюнді 3:1 есебімен жеңді. Біріккен күрес әлемінің (UWW) рейтингінде қарсыласы бесінші орында, ал қазақстандық балуан 34-орында тұр.
Еркін, грек-рим және әйелдер күресінен әлем чемпионаты Астанада 24 қазан мен 1 қараша аралығында «Барыс Аренада» өтіп жатыр. Бұған дейін әйелдер күресінде Ирина Кузнецова жүлдесіз қалды, ал еркін күресте 2023 жылғы әлем чемпионы Ризабек Айтмұхан Садулаевқа жеңілді.
