NASA ғарышкері Анил Менон мен Канада ғарыш агенттігінің ғарышкері Джошуа Кутрик бүгін, 29 қазанда, Халықаралық ғарыш станциясынан ашық ғарышқа шығады. Жұмыс Астана уақытымен сағат 17:00-де басталады деп жоспарланған. Ғарышкерлер станция сыртында шамамен 6 сағат 45 минут, яғни түн ортасына дейін жұмыс істейді. NASA хабарлауынша, канадалық ғарышкер соңғы жеті жылда алғаш рет ашық ғарышқа шығып отыр.
Басты міндет – станция фермасының сол жағына iROSA деп аталатын жаңа күн батареясын орнату. Бұл – орама күйінде сақталып, орнына жеткен соң кілем секілді жазылатын жеңіл панель. Алдымен ғарышкерлер батареяны уақытша сақтау алаңынан босатады. Содан кейін Менон станцияның 17 метрлік роботты «қолы» – Canadarm2 манипуляторының ұшына бекітіліп, батареяны құрастыру орнына жеткізеді. Кутрик ол жерге қауіпсіздік арқанына байланып, өзі барады. Екеуі бірге панельді бекітеді. Батареяны жазып, іске қосуды Жердегі ұшуды басқару орталығының мамандары қашықтан атқарады.
Станция ішінде NASA ғарышкерлері Джессика Уоткинс пен Люк Делейни жұмысты бақылап, манипуляторды басқарады. Канада әскери-әуе күштерінің полковнигі Кутрик үшін бұл – алғашқы ұшу әрі ашық ғарышқа алғашқы шығуы. Ол ХҒС-та бір айға жетпейтін уақыттан бері жүр. АҚШ Ғарыш күштерінің полковнигі Менон станция сыртына төртінші рет шығады. NASA бұл шығуға US EVA 100 нөмірін берген. Жалпы алғанда бұл – станцияны құрастыру, оған қызмет көрсету және жаңғыртуға байланысты 285-ші шығу.
Жаңа батарея сегіз панельдің жетіншісі болмақ. Соңғы, сегізінші панельді ферманың оң жағына келесі шығу кезінде, 5 қарашадан ерте емес орнату көзделіп отыр. Сегіз панельдің бәрі іске қосылғанда ХҒС энергия жүйесінің қуаты 160 киловаттан шамамен 215 киловаттқа дейін, яғни 30 пайызға дейін артады. Бұл энергия, өз кезегінде, жұмысы аяқталған соң станцияны орбитадан қауіпсіз әрі басқарылатын түрде түсіру үшін де қажет.
Жазылатын батареяларды ХҒС-қа 2021 жылы орната бастады. Оларды 2000 жылдардың басынан бері жұмыс істеп, уақыт өте келе қуатының бір бөлігін жоғалтқан ескі панельдердің үстіне қояды. Канадалық ғарышкер ашық ғарышқа соңғы рет 2019 жылғы 8 сәуірде шыққан. Ол кезде Давид Сен-Жак NASA ғарышкері Энн Макклейнмен бірге станция сыртында жұмыс істеген. NASA ашық ғарышқа шығуды өзінің NASA+ қызметінде тікелей көрсетеді.
