UFC-дің бұрынғы ауыр салмақтағы чемпионы Том Аспиналл көзін келесі рет тек қаңтардың соңында тексертеді – октагонға қашан оралатыны осыған байланысты. Жанкүйердің оралу мерзімі туралы сұрағына британдық әлеуметтік желіде қысқа ғана: «Келесі тексерулер қаңтардың соңында», – деп жауап берді. Бұл туралы The Independent хабарлады.
33 жастағы Аспиналл 2025 жылдың қазанынан бері торға шыққан жоқ. UFC 321 турнирінде абсолютті чемпион атағын алғаш қорғаған кезде қарсыласы Сириль Ган оның екі көзіне де саусағын тығып алды, британдық жекпе-жекті жалғастыра алмады. Кейін дәрігерлер оған травматикалық екі жақты Браун синдромы деген диагноз қойды. Бұл – көздің сирек кездесетін зақымы: адамның көзі екіге көреді, ал көз алмасының қозғалысы шектеледі. Оралуға дайындық кезінде жарақаты қайта қозғаннан кейін Аспиналл қыркүйекте белбеуінен бас тартты.
Британдық емделіп жүргенде Ганның өзі чемпион атанды. Француз Ақ үй жанындағы турнирде Алекс Перейраны нокаутқа түсіріп, уақытша титулды жеңіп алды. Кейін ол толыққанды чемпион мәртебесін алып, сенбі күні Нью-Йорктегі UFC 334 турнирінде Джош Хокитті төрешілер шешімімен жеңіп, белбеуін қорғады – үш төрешінің үшеуі де 48:47 деп берді. Бұл жолы да жанжалсыз болмады: бірінші раундта Ган Хокиттің де көзіне саусағын тықты. Ол рефери Марк Годдардқа шағымданды, бірақ төреші ережені бұзуды байқамаған сияқты. Егер французға айып ұпайы берілгенде, жекпе-жек тең аяқталар еді.
Рефери шешімі әлі де талқыланып жатыр: UFC комментаторы Джо Роган Ганды осы әрекеті үшін жазалау керек еді деп мәлімдеді, ал Перейра французның жеңісін тонау деп атады. Уақытша титулды жеңіп алғаннан бері соңғы үш жылда Аспиналл небәрі екі жекпе-жек өткізді.



