Жасанды интеллектке арналған жабдыққа сұраныс бүкіл әлемде бағаны өсіріп, ірі орталық банктерді саясатты қатаңдатуға, яғни мөлшерлемелерді көтеруге мәжбүр етеді. Бұл туралы 19 қарашада, бейсенбіде, Халықаралық валюта қорының басқарушы директоры Кристалина Георгиева Қытайдың Шэньчжэнь қаласында өткен АТЭС саммитінде мәлімдеді, деп жазады The Guardian.
Георгиеваның айтуынша, ЖИ бумы Таяу Шығыстағы соғыстан туған энергетикалық күйзеліспен қосылып, әлемдік инфляцияны үдетіп отыр: биыл ол 4,7%-ға жетеді. Сондықтан көптеген экономикада ақша-кредит саясатын қатаңдату қажет, деп хабарлайды Reuters. Энергетикалық күйзеліс уақыт өте келе басылады, ал «ЖИ — мәңгілік», деді қор басшысы.
ЖИ жабдығы мен оған байланысты тауарлар қазірдің өзінде әлемдік тауар саудасының оннан бір бөлігінен астамын құрайды, әрі бұл үлес жылдам өсіп келеді. Георгиеваның бағалауынша, ЖИ-ді жедел енгізу Иранмен соғысқа қарамастан бірқатар елдің күткеннен жылдам өсуіне көмектесіп жатыр, бірақ бұл инвестициядан бәрі бірдей ұтып отырған жоқ. Елдерге цифрлық инфрақұрылым, еңбек нарығы және ЖИ-ге дайын қызметкерлер қажет. «Қарапайым тілмен айтқанда: ұйықтаған ұтылады», — деді ол.
Қазақстан үшін мөлшерлеме мәселесі ЖИ-сіз де өзекті. Елде 4–17 қараша аралығында жұмыс істеген ХВҚ миссиясы Ұлттық банк үшін «базалық мөлшерлемені көтеру орынды болып көрінеді» деген қорытындыға келді, деп хабарлайды The Times of Central Asia. Қазір мөлшерлеме 15,75%, қазандағы жылдық инфляция 9,2%. Ұлттық банк мөлшерлеме бойынша келесі шешімін 4 желтоқсанда жариялайды.
Ірі орталық банктер мөлшерлемені көтеріп жатыр: Еуропалық орталық банк оны маусымда — 2023 жылдан бері алғаш рет, АҚШ Федералдық резервтік жүйесі қыркүйекте, Англия банкі қараша басында көтерді. Нарық жаңа көтерулерді күтуде, ал ФРЖ-ның қазан отырысының хаттамасына қарағанда, комитет мүшелерінің барлығы дерлік саясатты одан әрі қатаңдатуды жақтайды. Бұған дейін Георгиева әлемдік экономика «бір аяқпен» — жасанды интеллектпен тұр деп ескерткен.



