BYD компаниясының Denza B5 гибридті жол талғамайтын көлігі салмағы 180 тонна Boeing 747 жолаушылар ұшағын тек сол жақ доңғалақтарымен жүріп сүйреді: оң жақтағы екі доңғалағы шешіліп алынған. BYD сынақты Ұлыбританиядағы сынақ алаңында өткізді, деп хабарлайды CarNewsChina. Үш әрекетте көлік ұшақты жалпы 1600 метрге сүйреп апарды.
Ұшақты көлікке қатты тіркеуішпен жалғаған. Бірінші әрекетте B5 үш доңғалақпен жүрді, ал салонға 2 тонна жүк салынды — әр доңғалаққа 60 тоннадан сүйретілетін салмақ келді. Екінші әрекетте инженерлер оң жақтағы екі доңғалақты шешіп, 4,5 тонна жүк тиеді, сөйтіп бір доңғалаққа түсетін салмақ 90 тоннаға жетті. Өндірушінің айтуынша, көлік сынақ үшін арнайы өзгертілмеген — бұл кәдімгі сериялық B5.
Бұған DiSus-P гидравликалық аспасы көмектесті: ол жол саңылауын 140 мм аралығында өзгертеді және 9 тоннаға дейін көтере алады. Шанағының 96 пайызы жоғары берік болаттан жасалған, ал батарея тікелей шассиге орнатылған. Сонымен қатар алдыңғы және артқы доңғалақтар механикалық түрде байланыспаған: әр осьті жеке электр қозғалтқышы айналдырады. Сондықтан CarNewsChina бағалауынша, доңғалақтарды бір бүйірден емес, алдыңғы не артқы жағынан шешкенде ұшақты сүйреу әлдеқайда қиын болар еді.
Denza B5 көлігінде DM-O қайта зарядталатын гибридті қондырғысы орнатылған:
- 1,5 литрлік бензин турбоқозғалтқышы — 181 ат күші;
- алдыңғы электр қозғалтқышы — 268 ат күші;
- артқы электр қозғалтқышы — 382 ат күші;
- жалпы қуаты — 536 ат күші, айналдыру моменті — 760 Н·м.
Бұл сынақпен BYD бір кезде Boeing 747-ні сүйреген Volkswagen Touareg-тың әйгілі трюкін қайталады. Қытайда модель Fangchengbao Bao 5 (Leopard 5) деген атпен сатылады, ал шетелде Denza маркасымен шығады. Ұлыбританияда Elegance нұсқасы 70 345 фунттан (шамамен 41 млн теңге) басталады, ал Ultimate нұсқасы 79 725 фунт (шамамен 47 млн теңге) тұрады.



