Испанияның Толедо провинциясында 28 қазан күні таңертең Renfe компаниясының жүрдек пойызы Урда станциясы маңында тұрған жеке тасымалдаушы Iryo құрамына соғылды. Кемінде 64 адам қаза тапты, 80-ге жуық адам зардап шекті, олардың 50-і ауыр халде.
Апат жергілікті уақытпен сағат 08:54-те Мадрид — Андалусия жүрдек желісінде, Урда мен Лос-Йебенес елді мекендерінің арасында болды. Екі пойыз да Мадридтен оңтүстікке, Севилья бағытына қарай бара жатқан. Iryo пойызы бағдаршамның алдында тоқтап тұрған, ал артынан келе жатқан Renfe құрамы жылдамдығын азайтпай, оның соңғы вагонына соғылған. Екі пойыздың бірнеше вагоны рельстен шығып, бір бөлігі үйіндіден құлап түсті.
Екі құрамда 540-тан астам адам болған: Iryo пойызында нәрестені қоса алғанда 147 адам, Renfe пойызында 397 адам. Қаза тапқандар туралы деректі Кастилия — Ла-Манча автономиялық қауымдастығының билігі хабарлады. Қауымдастық президенті Эмилиано Гарсия-Пахе қаза тапқандар саны артуы мүмкін екенін ескертті: құтқарушылар қираған вагондарды әлі де тексеріп жатыр.
Оқиға орнына өрт сөндірушілер, азаматтық қорғау қызметі, әскери құтқарушылар, санитариялық тікұшақтар мен жедел жәрдем көліктері жіберілді. Жолаушылардың бір бөлігі мыжылған вагондардың ішінде қалып қойды. Зардап шеккендер Кастилия — Ла-Манча мен Мадрид ауруханаларына жеткізіліп жатыр, Урдада олар үшін спорт павильоны дайындалды.
Соқтығыстың себебі анықталып жатыр. Алдын ала деректер бойынша, теміржол инфрақұрылымының мемлекеттік операторы Adif қызметкерінің қатесі туралы нұсқа қарастырылуда. Испания үкіметіндегі дереккөздер мұны Мадридтегі Аточа вокзалындағы диспетчерлік орталықтың жұмысымен байланыстырады. Adif Мадрид пен Андалусия арасындағы жүрдек қатынасты уақытша тоқтатты.
Қазақстан СІМ мәліметінше, қолда бар деректер бойынша қаза тапқандар мен зардап шеккендердің арасында Қазақстан азаматтары жоқ. Ақпарат әлі нақтыланып жатыр.
Бұл — биыл Испанияда болған екінші ірі теміржол апаты. 18 қаңтарда Кордова провинциясындағы Адамус маңында Iryo пойызы рельстен шығып, оған Renfe құрамы соғылған еді. Ол кезде 46 адам қаза тапқан.
