Қазақстанның әйелдер құрамасы УЕФА әйелдер Ұлттар лигасы-2027 турнирінің C лигасында ойнайды, ал топтық кезеңнің жеребесінде екінші себетке орналастырылды. Қарсыластары 3 қарашада белгілі болады: жеребе Швейцарияның Нион қаласында Астана уақытымен сағат 17:00-де басталады.
C лигасында 22 құрама өнер көрсетеді. Олар алты топқа бөлінеді: төрт топта төрт командадан, қалған екеуінде үш командадан болады. Құрамалардың лигаларға бөлінуін әйелдер арасындағы әлем чемпионатының еуропалық іріктеуінің қорытынды рейтингі анықтады.
C лигасының себеттері мынадай:
- бірінші себет — Словакия, Израиль, Черногория, Латвия, Мальта, Люксембург;
- екінші себет — Хорватия, Қазақстан, Әзербайжан, Фарер аралдары, Молдова, Босния және Герцеговина;
- үшінші себет — Эстония, Кипр, Армения, Грузия, Болгария, Солтүстік Македония;
- төртінші себет — Андорра, Лихтенштейн, Гибралтар, Сан-Марино.
Жеребе кезінде бірқатар шектеу қолданылады. Әзербайжан мен Армения бір топқа түспейді. Қазақстан үшін алыс сапарларға байланысты шектеу қарастырылған: ол құраманың Мальта, Андорра және Гибралтармен бір топқа түсу мүмкіндігіне қатысты.
