«Уотфорд» бас бапкер Алессио Дионизиді 18 ойыннан кейін жұмыстан босатты, деп хабарлады клуб. Шешім сенбіде «Шеффилд Юнайтедтен» 0:4 есебімен жеңілгеннен кейін қабылданды. Команда Чемпионшипте небәрі төрт жеңіске жетіп, 21-орында тұр.
«Біз Алессио мен оның штабына кәсібилігі мен еңбегі үшін алғыс айтамыз. Алессио — шынымен жақсы адам, біз оған болашақта сәттілік тілейміз. Оның орнына адам іздеу процесі басталды, біз оны жақын арада жариялай аламыз деп үміттенеміз», — деді клубтың спорт директоры Люк Даулинг.
BBC есебінше, «Уотфорд» 18 айда алтыншы бапкерді және 2012 жылы клуб Поццо отбасының бақылауына өткеннен бері 25-бапкерді іздеп жатыр. 145 жылдық тарихында клубта 57 штаттық бас бапкер болған, ал Дионизи 2020/21 маусымының соңынан бері 12-бас бапкер еді.
Итальяндық маман маусымда үш ай ғана жұмыс істеген Эд Стиллдің орнына тағайындалған. Бұған дейін, наурызда, Дионизи «Эмполиден» босатылған болатын.



