Мазмұнға өту

Блогер Махамбет Әбжанға үкім: кассация 9 жылды өзгеріссіз қалдырды

Адвокат Ольга Эннс барлық сот актілерінің күшін жойып, істі тоқтатуды сұрады, алайда прокурор шағымды қанағаттандырмауды талап етті.

Судейский молоток — кассация по делу блогера Махамбета Абжана
Фото: Unsplash

Қылмыстық істер жөніндегі кассациялық сот блогер Махамбет Әбжанға шығарылған үкімді күшінде қалдырды. Ол 50 млн теңге бопсалағаны және кәсіпкер туралы көрінеу жалған ақпарат таратқаны үшін 9 жылға бас бостандығынан айырылған. Шешім туралы 19 қарашада «Курсив» хабарлады. «Кассациялық шағымды қанағаттандыруға негіз жоқ, сот актілері өзгеріссіз қалдырылуға тиіс», делінген сот қаулысында.

Кассациялық шағымды Әбжанның адвокаты Ольга Эннс берген. Оның айтуынша, блогердің кінәсі дәлелденбеген, тергеу көптеген бұзушылыққа жол берген, ал іс толық қаралмаған. Қорғау тарапы барлық үкімнің күшін жойып, істі тоқтатуды сұрады. Прокурор шағымды қанағаттандырусыз қалдыруды өтінді. Отырыс жабық режимде өтті.

Тергеу нұсқасы бойынша, 2022 жылғы маусым–шілде айларында Әбжан мәлімет жинап, ABZHAN NEWS арнасында Астанадағы екі коммуналдық кәсіпорын басшысы мен кәсіпкер туралы жалған пост жариялаған. Пост кәсіпкерді шулы қылмыстық іспен байланыстырған. Жарияланымнан кейін жалға беруші кәсіпкермен жалдау шартын біржақты бұзып, тұрақсыздық айыбын талап еткен. Шығын 49 592 000 теңге болған. Тергеу деректері бойынша, кейін блогер кәсіпкердің өкілі арқылы жарияланымдарды тоқтату үшін 50 млн теңге талап еткен. Ол ақшаны алып жатқан сәтте ұсталған.

Астананың мамандандырылған ауданаралық қылмыстық істер жөніндегі соты 2023 жылғы 3 ақпанда Әбжанға жалған ақпарат таратқаны үшін 2 жыл, бопсалағаны үшін 9 жыл тағайындап, жиынтығында 9 жылға соттаған. Сот оның әрекетінен қауіпті рецидивті таныған: блогер 2017 жылғы үкіммен де сотталған. 2023 жылғы 24 наурызда Астана қалалық сотының қылмыстық істер жөніндегі алқасы үкімді өзгеріссіз қалдырған.

Бастапқыда сот Әбжанға жазасын төтенше қауіпсіздік мекемесінде өтеуді тағайындаған. 2023 жылғы 16 маусымда Ақмола облысының Аршалы аудандық соты оны максималды қауіпсіздік мекемесіне ауыстырды.

БөлісуTelegramWhatsAppVKFacebookX

Сондай-ақ оқыңыз