Украина Қорғаныс министрлігінің Барлау бас басқармасы (ГУР) Украинаның оңтүстік-шығысындағы Запорожье облысы Комышуваха кентінің жерасты мектебіне авиабомбамен соққы жасауға қатысы бар ресейлік әскерилерді анықтады. Барлау шабуылды ұйымдастырған офицерді және гуманитарлық көмек алуға келген адамдарға бомба тастаған алты ұшқыштың атын атады. Осы аралықта қаза тапқандар саны 55-ке жетті. Бұл туралы 7 қарашада, сенбі күні таңғы сағат 06:42 шамасында (Астана уақытымен 09:42-де) Украина Төтенше жағдайлар мемлекеттік қызметі (ТЖМҚ) хабарлады.
ГУР деректері бойынша, 2 қарашадағы соққыны ресейлік «Днепр» әскери тобы штабының оқпен зақымдау тобының бастығы полковник Федор Владимирович Зубаков жоспарлаған. Шабуылға төрт Су-34 майдандық бомбалаушы ұшағы жұмсалған. Барлаудың айтуынша, операцияға РФ Бас штабы резервіндегі авиатоптың арнайы жауынгерлік тобына қарасты №5 тактикалық авиатоп қатысқан. Ол Ресей Әуе-ғарыш күштері мен әуе шабуылына қарсы қорғаныс 4-армиясының 4-аралас авиадивизиясына қарасты 11-аралас авиаполкі (77978 әскери бөлім) мен 1-аралас авиадивизиясына қарасты 559-бомбалаушы авиаполкінің ұшқыштарынан құрылған.
ГУР бомбаларды тастады деп есептейтін ұшқыштардың аты-жөні:
- капитан Сергей Александрович Елисеев;
- капитан Дмитрий Андреевич Зверев;
- аға лейтенант Родион Сергеевич Плотников;
- аға лейтенант Никита Викторович Игнатьев;
- аға лейтенант Максим Викторович Соколенко;
- лейтенант Вадим Олегович Перехрест.
Барлаудың хабарлауынша, тағы бір ұшақтың экипажы әлі анықталып жатыр. «Украина халқына қарсы жасалған әрбір әскери қылмыс үшін әділ жаза болады», — деді ГУР өкілдері.
Барлау шабуылдың барысын да қалпына келтірді. Алдымен Комышувахадағы «Джерело» гимназиясына екі басқарылатын авиабомба түскен. Шамамен бір сағаттан кейін мықтылық пункті мен жергілікті тұрғындарға арналған баспана орналасқан жерасты бөлмесіне ФАБ-3000 тасталған. Бұл — салмағы үш тонна, жартысына жуығы жарылғыш заттан тұратын авиабомба. Украинадағы мықтылық пункттерінде адамдар жылынып, телефонын қуаттап, көмек ала алады. Алдын ала деректер бойынша, соққы кезінде онда жүзге жуық адам болуы мүмкін.
Іздестіру жұмыстары алтыншы тәулік бойы жалғасып жатыр. ТЖМҚ мәліметінше, соңғы тәулікте құтқарушылар үйінді астынан тағы тоғыз адамның денесі мен дене бөліктерін шығарған. Осылайша қаза тапқандар саны 53-тен 55-ке артты. Кент майдан шебінен небәрі 20 шақырымдай жерде орналасқан, сондықтан құтқарушылар мен кинологтар қайта соққы қаупі төніп тұрғанына қарамастан, опырылған құрылыстарды аршып, аумақты тексеруді жалғастырып жатыр. Алдын ала бағалау бойынша, үйінді астында тағы 30-ға жуық адамның денесі қалуы мүмкін. Қаза тапқандардың бір бөлігін тану мүмкін емес, сондықтан хабарсыз кеткендердің туыстарынан ДНҚ үлгілері алынып жатыр.
Төменде — Украина ТЖМҚ-ның 7 қараша күні таңертең жариялаған, соққы болған жердегі іздестіру жұмыстары түсірілген бейнежазбасы бар посты.
Нан мен гуманитарлық көмек алуға келген адамдарға соққы жасау, сосын оқиға орнына келген полицейлер мен құтқарушыларды қайта атқылау — әскери қылмыс. Бұл соңғы айлардағы Ресейдің Украинаның бейбіт тұрғындарына қарсы жасаған ең қанды лаңкестік шабуылдарының бірі. Қаза тапқандардың арасында төрт полицей мен ТЖМҚ-ның екі қызметкері бар. Украина президенті Владимир Зеленский қасіреттен кейін әлемді үнсіздігі үшін сынады: «Бұл туралы бүкіл әлем дерлік үндемей отыр».
Құрбандар саны күн сайын өсті: 2 қараша күні кешке құтқарушылар 26 адамның қаза тапқанын хабарлады, 3 қарашада — 31, 4 қарашада — 40, 6 қарашада — 50, кейін 53 адамның қаза тапқаны белгілі болды. Соққыдан кейін Запорожье облысында үш күндік аза жарияланған. Толық ауқымды басқыншылыққа дейін Комышувахада 5 мыңға жуық адам тұрған, облыстық әскери әкімшіліктің бағалауынша, қазір онда 500-дей адам, негізінен егде жастағылар қалған. Ресей кентке Херсон облысындағы басып алынған Алешки қаласының маңындағы алты күндік бітімнің аяқталғанынан кейінгі күні соққы жасады. Сол бітім кезінде қаладан 800-ге жуық бейбіт тұрғын шығарылған еді.
