Қытайдың Dongpeng және Mengniu компаниялары 27 қазанда Мадридтің «Реал» клубы мен Франция құрамасының шабуылшысы Килиан Мбаппемен демеушілік келісімшарттарын бұзды. Оған футболшы өз бетін «Қытай диктаторы» деп ойлаған адамның бейнесіне орнатқан суретті ең күлкілі мем деп атаған видео себеп болды. Қытайдың The Paper басылымының мәліметінше, елдің мемлекеттік телеарнасы Ла Лигаға және Мбаппеге қатысты барлық матчтар мен оқиғаларды көрсетуді тоқтатты.
Видео сәуір айында француздың The Bridge подкастына жазылған, бірақ әлеуметтік желіде 26 қазанда кеңінен тарады. Мбаппе ешкімнің атын атаған жоқ, алайда әлемнің ірі БАҚ-тары дау-дамайды Мао Цзэдун бейнеленген мемге байланыстырып отыр.
Сусын өндіретін Dongpeng компаниясы келісімшартты «дереу күшіне енетіндей етіп» бұзды. Қытайдағы ең ірі сүт өнімдерін өндіруші Mengniu да футболшымен ынтымақтастықты тоқтатты. ҚХР Сыртқы істер министрлігі қытай халқының сезіміне тиетін сөз бен әрекет «қытай қоғамының барлық топтарының ортақ қарсылығына табиғи түрде тап болатынын» мәлімдеді.
Мбаппе француз, қытай және ағылшын тілдерінде кешірім сұрады. Ол өз сөзін «ойланбай айтылған» деп атап, Қытайдағы адамдар мен шетелдегі қытай қауымдастықтарының көңіліне тигенін мойындады және «қытай халқы мен оның тарихына терең құрметпен қарайтынын» айтты.
Ла Лига болған оқиғаға «қатты өкінетінін» білдіріп, Мбаппенің сөзі лиганың емес, оның жеке пікірі екенін мәлімдеді. Ла Лига президенті Хавьер Тебас X әлеуметтік желісінде кешірім сұрады. Ол лиганың Қытайдағы серіктестерімен жұмыс істеп жатқанын айтып, көпжылдық қарым-қатынасты «бір оқиға бұза алмайтынына» сенім білдірді. Дау Мбаппе «Алтын доп» дауыс беруінде Гарри Кейннен кейін екінші орын алғаннан кейін көп ұзамай басталды.
