Қазақстан құрамасы 6–8 қараша аралығында Ташкентте өтетін самбодан әлем чемпионатына қатысатын құрамды анықтады. Ел намысын 28 спортшы қорғайды: олар спорттық және жауынгерлік самбодан ерлер мен әйелдер арасындағы әр салмақ дәрежесінде бір-бірден шығады. Құрамды Туризм және спорт министрлігінің Спортты дамыту дирекциясы жариялады.
Өзбекстан астанасындағы турнирде үш дисциплина бойынша 33 медаль жиынтығы сарапқа салынады: спорттық самбода — 14, лақтыру мен ауыртпалық әдістерінен бөлек соққы жасауға рұқсат етілетін жауынгерлік самбода — 14, көру қабілеті бұзылған спортшылар арасында бесеуі. Жарыс Game Sports Arena кешенінде өтеді. Ұйымдастырушылардың дерегінше, чемпионатқа 60-тан астам елден 400-ге жуық спортшы тіркелген.
Спорттық самбодан ерлер арасында Армат Қабдолов (58 келіге дейін), Жандос Бейсенбаев (64 келіге дейін), Арнұр Қуатай (71 келіге дейін), Еркебұлан Негметов (79 келіге дейін), Нұрбол Серіков (88 келіге дейін), Нұрымжан Ғаббасов (98 келіге дейін) және Болат Сапар (98 келіден жоғары) бақ сынайды. Әйелдер құрамында Айжан Жылқыбаева (50 келіге дейін), Гүлдана Әлмұханбетова (54 келіге дейін), Гүлзира Құдасбек (59 келіге дейін), Аружан Сатова (65 келіге дейін), Анель Қайратқызы (72 келіге дейін), Мадина Ержан (80 келіге дейін) және Арайлым Абенова (80 келіден жоғары) бар.
Жауынгерлік самбодан ерлер арасында Арман Тұрымбетов (58 келіге дейін), Шадияр Серік (64 келіге дейін), Ниетхан Төлеухан (71 келіге дейін), Санжар Нұрсейіт (79 келіге дейін), Бақытжан Дүйсембеков (88 келіге дейін), Райхан Мәди (98 келіге дейін) және Талғат Жиентаев (98 келіден жоғары) өнер көрсетеді. Әйелдерден Жадыра Пайыз (50 келіге дейін), Гүлмайра Сағиданова (54 келіге дейін), Маржан Бизак (59 келіге дейін), Арай Төлебай (65 келіге дейін), Аружан Әсемқамалқызы (72 келіге дейін), Замзагүл Файзолланова (80 келіге дейін) және Нұрила Асанқызы (80 келіден жоғары) шығады.
Былтыр Бішкекте өткен әлем чемпионатында Қазақстан құрамасы екі алтын, екі күміс және сегіз қола медаль жеңіп, командалық есепте екінші орын алды. Сол кезде қола жүлденің бірін Арман Тұрымбетов иеленген, ол бұл жолы да 58 келіге дейінгі салмақта шығады. Негметов пен Бейсенбаев биыл Дүниежүзілік көшпенділер ойындарындағы самбо турнирінің қола жүлдегері атанды.
