Франция Мәдениет министрлігі 22 қазанда Париждің ірі мұражайлары 24 қазан, сенбі күні жоспардан тыс жабылатынын хабарлады. Бұл күні Лувр, Орсе мұражайы, Пикассоның ұлттық мұражайы және Гран-Пале көрме кешені келушілерді қабылдамайды. Себебі – астанада жаппай наразылық акциялары күтіліп отыр.
Министрлік бұл шешімді келушілердің қауіпсіздігін қамтамасыз ету, қызметкерлерді қорғау және өнер туындыларын сақтау үшін қабылдағанын түсіндірді. Ведомствоға қарасты барлық мекемеге алдын алу шараларын қабылдау тапсырылды.
Гран-Паледе өтіп жатқан Art Basel Paris заманауи өнер жәрмеңкесінің ұйымдастырушылары да оны екі күн ерте – 23 қазан, жұма күні кешке жабуға шешім қабылдады. Олар да қатысушылар, қонақтар мен экспонаттардың қауіпсіздігін алға тартты.
Франция Президенті Эммануэль Макрон сенбі күні Парижде тек кәсіподақтардың алдын ала келісілген шерулеріне ғана рұқсат берілетінін мәлімдеді. Билік күзетті күшейтіп, көшеге көбірек полиция қызметкерін шығаратынын айтты. Бірқатар қала мен департамент бұл күні кез келген акцияға толық тыйым салды. Мәселен, Лилль қаласының орталығында демонстрация өткізуге болмайды.
Сенбідегі акция тұрмыс құнының өсуіне қарсы наразылықтың екінші «актісі» болмақ. 17 қазандағы алғашқы толқын қымбатшылыққа қарсы және лицейшілерді қолдау шеруі ретінде басталды. Кейін ол Париж, Лион, Марсель және өзге қалаларда тәртіпсіздік пен тонауға ұласты. Осыдан соң билік Париж, Лилль және Ницца қалаларының кей аудандарында түнгі коменданттық сағат енгізді. Астанада шектеу Республика алаңы маңында және Ле-Аль кварталының бір бөлігінде қолданылады. 19 қазанда көркемөнер мектептерінің студенттері Луврдың кіреберісін бұғаттап, мұражай әдеттегі уақытта ашыла алмады.
