Ақмола облысы прокуратурасының араласуымен Ерейментау ауданының 3 013 тұрғынына қатты тұрмыстық қалдықты (ҚТҚ) шығару үшін негізсіз есептелген төлемдер алынып тасталды. Жойылған шоттардың жалпы сомасы 1,1 млн теңге. Бұған қоса тұрғындарға 60 251 теңге қайтарылды.
Заңбұзушылық ҚТҚ шығару ақысының заңдылығын тексеру кезінде анықталды. Шоттарды «Repoint» ЖШС Kaspi.kz қосымшасы арқылы жіберген. Оларды Ерейментау қаласындағы қоқыс контейнері жоқ жеке үйлердің тұрғындары алған. Прокуратураның мәліметінше, тұрғындар қалдықты өздері шығарған.
Төлемдер прокуратура қадағалау актісін енгізгеннен кейін жойылды.
Қоқыс шығару ережелері мен құны соңғы айларда басқа өңірлерде де өзгеріп жатыр. Өскеменде 1 қыркүйектен бастап қоқыс шығару тарифі шамамен 76%-ға өсті, ал 16 қарашадан бастап пәтер иелерінің бірлестіктері мен кооперативтері қалдықты сұрыптағаны үшін ақы ала алады.
