Алматыда «Канал – Каспий шамшырағы» атты халықаралық есірткіге қарсы операция басталды. Ол Ұжымдық қауіпсіздік туралы шарт ұйымының (ҰҚШҰ) «Канал» өңірлік операциясы аясында 2026 жылғы 26–30 қазан аралығында өтеді. Бұл туралы Қазақстан Республикасы Ішкі істер министрлігі хабарлады.
Операцияға Қазақстан, Беларусь, Қырғызстан, Ресей және Тәжікстанның құқық қорғау органдары қатысып жатыр. Иран, Қытай, Орталық Азия өңірлік ақпараттық үйлестіру орталығы (ЦАРИКЦ), Қылмыстық кірістерді заңдастыруға және терроризмді қаржыландыруға қарсы іс-қимыл жөніндегі Еуразиялық топ (ЕАГ) және ТМД кеден қызметтері басшылары кеңесінің үйлестіру органы өкілдері бақылаушы ретінде қатысады.
Операцияның мақсаты — есірткінің заңсыз айналымы арналарын анықтап, жолын кесу, есірткінің мемлекеттік шекаралар арқылы тасымалдануына жол бермеу және есірткі бизнесіне байланысты ұйымдасқан қылмыстық топтардың әрекетіне тосқауыл қою.
Операция кезінде көлік тораптарында — әуежайларда, теңіз порттарында және теміржол вокзалдарында тексеру күшейеді. Багажға, жүктерге және халықаралық пошта жөнелтілімдеріне ерекше назар аударылады.
Жеке бағыт — интернет пен басқа да IT-арналар арқылы есірткі сату. Сонымен қатар құқық қорғау органдары қаруның заңсыз айналымын және есірткі саудасынан түскен ақшаның заңдастырылуын тексереді.
ҰҚШҰ елдері операцияға алдын ала дайындалды: оны ұйымдастыру жөніндегі жұмыс тобы бұған дейін Ақтауда бас қосқан. Есірткіні онлайн сату қазақстандық полиция үшін басты мәселелердің бірі болып қала береді: ІІМ бұған дейін жылдың бірінші жартысында ғана «Кибернадзор» жүйесі арқылы заңға қайшы контенті бар 6 мың сайт бұғатталғанын хабарлаған.
«Канал» — ҰҚШҰ-ның есірткіге қарсы өңірлік операциясы, ал «Каспий шамшырағы» — оның субөңірлік кезеңі.
