Қазақстан күрес федерациясының президенті Еркін Оқасов 23 қазанда Біріккен күрес әлемінің (United World Wrestling, UWW) бюросына мүше болып сайланды. Бюро – халықаралық федерацияның атқарушы органы. Дауыс беру Астанада өткен UWW-дің кезекті конгресінде өтті. Қазақстан федерациясының хабарлауынша, Оқасовқа делегаттар 117 дауыс берді. Ал Ресей спорттық күрес федерациясының президенті Михаил Мамиашвили қажетті дауыс жинай алмай, бюродағы орнын сақтап қала алмады.
Конгресте бюродағы алты орынға сайлау өтті. UWW президенттігіне 68 жастағы серб Ненад Лалович қайта сайланды. Ол жалғыз үміткер болды және ұйымды 2014 жылдан бері басқарып келеді. Бюро екі жылда бір рет шақырылатын конгрестер аралығында федерацияны басқарады: жарыс ережелері мен күнтізбесін бекітеді, спортшыларды жарысқа жіберу және санкция мәселелерін шешеді.
Мамиашвили – 1988 жылғы Олимпиада чемпионы, үш дүркін әлем және Еуропа чемпионы. Ол UWW бюросында 2014 жылдан бері болған. Дауыс беруден кейін ол мұндай нәтижені күткенін айтып, оны санкциялармен байланыстырды. Ол кеткеннен кейін халықаралық федерация басшылығында Ресейдің өкілі қалмады.
2026 жылғы тамызда Мамиашвили Еуроодақтың санкциялық тізіміне енгеннен кейін UWW вице-президенті қызметінен кетті. Оқасов Қазақстан күрес федерациясын 2025 жылғы желтоқсаннан бері басқарады, бұл қызметте ол Дәулет Тұрлыхановтың орнын басты.
Конгресс Астанада 24 қазан мен 1 қараша аралығында өтетін әлем чемпионатына орайластырылды. Турнирде еркін, грек-рим және әйелдер күресінен 30 медаль жиынтығы сарапқа салынады. Бастапқыда чемпионатты Манама қабылдауы тиіс еді, кейін UWW өткізу орны ретінде Астананы бекітті. Қазақстан құрамасына еркін күрестен әлем чемпиондары Ризабек Айтмұхан мен Нұрқожа Қайпанов енді.
