Француз ультраоңшылдарының көшбасшысы Марин Ле Пен 25 қазанда 2027 жылғы президент сайлауына дайындық науқанын ресми түрде бастады. «Ұлттық бірлестік» партиясының съезі Орлеандағы митингімен аяқталды. Сол жерде ол Эммануэль Макронның он жылдық билігінен кейін «Францияны қайта түлетуге» және заң үстемдігін қалпына келтіруге уәде берді. Ұйымдастырушылардың дерегінше, жиынға 8,5 мыңға жуық жақтасы келген.
Ле Пен бағдарламасының басты бағыттары — қауіпсіздік пен көші-қон. Ол сот үкімдерінің міндетті түрде орындалуын, заң бұзған шетелдіктерді елден шығаруды, азаматтарға «ұлттық басымдық» беруді және француз әрі еуропалық «қос шекара» орнатуды ұсынды. Сондай-ақ көші-қон саясатында ЕО құқығының басымдығына қарсы референдум өткізуге және Францияның Еуроодақ бюджетіне жарнасын жылына 11 млрд еуроға қысқартуға уәде етті. Ле Пен француз жастарын бөгде соғыстарға жібермейтінін де айтты.
Партия сайлауға «Марин — президент, Барделла — үкімет басшысы» ұранымен шығады: жеңіске жетсе, үкіметті Жордан Барделла басқарады. Бір күн бұрын, 24 қазанда, ол «Ұлттық бірлестік» төрағалығына қайта сайланды: жалғыз үміткер ретінде 98,98% дауыс жинады. Ле Пен науқанға толық көңіл бөлу үшін партияның Ұлттық жиналыстағы фракциясын басқаруды Себастьен Шенюге тапсырды. Сахнаға олармен бірге одақтас «Республика үшін оңшылдар одағы» партиясының жетекшісі Эрик Чотти шықты.
Съезд күшейтілген күзетпен өтті: демалыс күндері Орлеанға 3 мыңға жуық полицей мен құтқарушы жіберілді. Сенбіде қалада съезге қарсы шеру өтті: мэрия дерегінше оған 13 мың, ұйымдастырушылардың бағалауынша 26 мың адам шықты. Сонымен қатар елдің түкпір-түкпірінде баға өсімі, жанармай құны мен білім беруді қаржыландыруға қатысты наразылық акциялары жалғасты. Әртүрлі бағалау бойынша оларға 410 мыңнан 800 мыңға дейін адам қатысып, 1314 адам ұсталды.
Ле Пеннің сайлауға түсуіне Париж апелляциялық соты жол ашты. 2025 жылғы наурызда бірінші сатыдағы сот оны Еуропарламент қаражатын партия көмекшілерінің жалақысына жұмсағаны үшін кінәлі деп танып, бес жылға сайлану құқығынан айырған, тыйым бірден күшіне енген еді. 2026 жылғы 7 шілдеде апелляциялық сот айыптау үкімін өзгеріссіз қалдырды, бірақ өтіп кеткен 15 айды ескеріп, тыйым мерзімін қысқартты. Осы шешім Ле Пенге сайлауға түсуге мүмкіндік берді. Сонымен бірге оған үш жылға бас бостандығынан айыру жазасы тағайындалды: оның екі жылы шартты, ал бір жылын ол электронды білезікпен өтеп жүр. Бұған қоса 100 мың еуро айыппұл салынды.
Франциядағы президент сайлауының бірінші туры 2027 жылғы 18 сәуірге, екінші туры 2 мамырға белгіленген. Қатарынан екі мерзім қызмет атқарған Макрон сайлауға түсе алмайды. Ле Пен президенттікке 2012, 2017 және 2022 жылдардан кейін төртінші рет үміткер болып отыр және қазір сауалнамаларда алда келеді.
