Ақмола облысындағы Бестөбе кентінде полицейлер карьерлердің бірінде заңсыз алтын өндірген 13 адамды ұстады. Олар полицияның заңды талаптарына бағынбаған, сондықтан СОБР жауынгерлері аспанға ескерту ретінде оқ атқан. Бұл туралы облыстық полиция департаменті хабарлады.
Ведомство мәліметінше, ұсталғандардың бәрі заңға сәйкес жауапқа тартылды. Қай баптар бойынша екені нақтыланбады. Полиция өңірде бағалы металдарды заңсыз өндірудің жолын кесу жұмысы жалғасып жатқанын айтты.
Бестөбе — ертеден алтын өндіретін кент. Мұнда заңсыз алтын өндірушілер жылдар бойы күзетті айналып өтіп, кен қазбаларына түседі. Қазан айының ортасында шахта аумағынан екі күн ішінде нысанға заңсыз кірген екі ер адамның денесі табылды. Полиция дерегінше, жыл басынан бері Степногорскіде күзетілетін нысандарға заңсыз кіргені үшін 322 адам жауапқа тартылған, ал өңірдегі шахталарда тоғыз адам қаза тапқан.
Мәселе жаңа емес: 2022 жылы «Қазақалтын» компаниясы сол жылдың өзінде Бестөбе кенішінде 941 заңсыз алтын өндіруші ұсталғанын хабарлаған еді. Заңсыз өндіріспен басқа өңірлерде де күрес жүріп жатыр — мысалы, ШҚО-да старательдікке берілген 15 лицензия кері қайтарылды.
