25 қазанда мемлекеттік орман қоры жерінде үш орман өрті болды: екеуі Қостанай облысында, біреуі «Семей орманы» мемлекеттік орман табиғи резерватында. Экология және табиғи ресурстар министрлігінің хабарлауынша, өрттің бәрі толық сөндірілді.
Өрт ошақтары авиамониторинг кезінде анықталды. Оларды сөндіруге орман күзеті мен арнайы техника жіберілді. Өрт шыққан аумақтың көлемі мен себебін министрлік нақтыламады.
«Семей орманы» үшін бұл күзгі алғашқы өрт емес: резерватта 3 қазанда да өрт сөндірілген. Қыркүйекте орман күзеті Жетісу облысы мен «Семей орманында» өртпен күресті, одан бұрын Қарағанды облысы мен екі резерваттағы орман жанды. Сондай-ақ Ұлттық қауіпсіздік комитеті резерваттағы заңсыз ағаш кесу схемасын әшкереледі.
