24 қазан күні кешке Габон жағалауында Borr Drilling компаниясының Prospector 5 өздігінен көтерілетін бұрғылау қондырғысы суға батты. Бортта 115 адам болған: бір жұмысшы қаза тапты, тағы төрт адамның тағдыры әзірге белгісіз.
Апат жергілікті уақыт бойынша сағат 21:40 шамасында Майюмба қаласы маңындағы Dussafu Marin лицензиялық учаскесінде, MaBoMo өндіру платформасына жақын жерде болды. Қондырғы норвегиялық BW Energy компаниясымен келісімшарт бойынша жұмыс істеген, бірақ бұрғылауды әлі бастамаған.
Қаза тапқан жұмысшы — Үндістан азаматы. Хабарсыз кеткендердің үшеуі — Габон азаматтары, біреуі — шетелдік маман. Габон билігі бұған дейін бес адам хабарсыз кеткенін хабарлаған, құрбандар саны әлі нақтыланып жатыр.
Borr Drilling-тің алдын ала деректері бойынша, тіректерге алдын ала салмақ түсіру кезінде қондырғы астындағы топырақ ойылып кеткен. Соның салдарынан платформа орнықтылығын жоғалтып, су астына кеткен. Компания басшысы Бруно Моран қазір басты міндет — іздестіру-құтқару жұмыстарына көмектесу және персоналды қолдау екенін айтты.
Габонның Мұнай және газ министрлігі дағдарыс штабын құрды. Оның құрамына әскери-теңіз күштері, Gabon Oil ұлттық компаниясы, BW Energy және Borr Drilling кірді. Флотқа теңіздегі іздестіруді күшейту тапсырылды, апат бойынша техникалық тергеу тағайындалды. Габон президенті Брис Олиги Нгема қажетті мемлекеттік ресурстың бәрін, оның ішінде әскери-теңіз күштерін жұмылдыруды тапсырды.
MaBoMo платформасындағы өндіріс сақтық шарасы ретінде тоқтатылды. Нысанға зақым келмеген, теңізге зиянды заттар төгілмеген. Жағалау мен Майюмба ұлттық саябағын қорғау үшін мұнай төгілісін жоюға арналған күштер оқиға орнында қалып отыр.
Бұрғылау қондырғыларындағы апат Қазақстанда да болған: 2025 жылдың жазында Маңғыстау облысындағы кен орнында бұрғылау мұнарасы құлады, ол кезде ешкім зардап шекпеді.
