Бибарыс Әшірбай, Данияр Ақбисенов және Индира Қыдырмолдаева 24 қазанда Черногорияның Будва қаласында өтіп жатқан World Boxing U19 жасөспірімдер арасындағы әлем чемпионатының жартылай финалына шықты. Үшеуі де ширек финалда жеңіске жетіп, кемінде қола медальға қол жеткізді.
70 келіге дейінгі салмақта Әшірбай 2025 жылғы АҚШ чемпионы Асанте Ламарды төрешілердің бірауызды шешімімен 3:0 есебімен ұтты. 60 келіге дейінгі салмақта Ақбисенов мексикалық Хосуэ Сепеданы 4:1 есебімен жеңді. Үш раундтың әрқайсысында қарсыласы нокдаунға түсті. Қыдырмолдаева әйелдер арасында 60 келіге дейінгі салмақта венесуэлалық Эдмар Муньосты төрешілердің бірауызды шешімімен жеңді.
Осы күні тағы бір қазақстандық боксшы Айдос Үсенов жарыстан шығып қалды. 55 келіге дейінгі салмақтағы ширек финалда ол ресейлік Ислам Магомедовқа төрешілердің бірауызды шешімімен есе жіберді.
Енді Будвада Қазақстан құрамасының кепілдендірілген алты медалі бар. Олимпиадалық бокста үшінші орын үшін жекпе-жек өткізілмейді, сондықтан жартылай финалда жеңілген екі боксшы да қола алады. Чемпионаттың финалдары 27 қазанда өтеді. U19 әлем чемпионаты – 19 жасқа дейінгі боксшылар үшін маусымның басты турнирі. Будвада 16–27 қазан аралығында 69 ұлттық федерациядан 474 спортшы бақ сынап жатыр.
Бір күн бұрын жартылай финалға екі ауыр салмақты боксшы жолдама алған еді: 90 келіге дейінгі салмақта Еркетан Жарқынбек және аса ауыр салмақтағы Владислав Саможонов. Құрамаға алғашқы медальды 80 келіден жоғары салмақта Зарина Толыбай кепілдендірген.
