23 қазанда күндіз Мәскеудің төрт әуежайы — Шереметьево, Внуково, Домодедово және Жуковский — ұшақтарды қабылдау мен ұшыруды тоқтатты. Бұған елордаға жасалған дрон шабуылы себеп болды. Шектеулер Мәскеу уақытымен сағат 14:00 шамасында (Астана уақытымен 16:00-де) енгізілді. Ресейдің Федералдық әуе көлігі агенттігі (Росавиация) шектеулер ұшу қауіпсіздігі үшін қажет екенін мәлімдеді. Шереметьевода әуе дабылы жарияланып, жолаушылар қауіпсіз аймақтар мен баспаналарға жіберілді.
Мәскеу мэрі Сергей Собянин қалаға жақындаған 22 ұшқышсыз ұшу аппараты атып түсірілгенін хабарлады. Зардап шеккендер мен қирау туралы ресми ақпарат жоқ. Атып түсірілген аппараттар туралы деректі Ресей тарапы келтіріп отыр, оны тәуелсіз дереккөздер растаған жоқ. Украина тарапы шабуылға қатысты пікір білдірмеді.
Шереметьевода барлық терминалдың стерильді аймағына кіру шектелді. Жолаушыларға дауыс зорайтқыш арқылы лифт пайдаланбау, терезеден аулақ тұру және болып жатқан жағдайды түсірмеу ескертілді. Ресей БАҚ-тарының мәліметінше, Мәскеу әуежайларында 340-тан астам рейс кешіктірілді немесе тоқтатылды. Кейбір ұшақтар қонуды күтіп, Мәскеу облысының үстінде айналып ұшты, енді бірі қосалқы әуеайлақтарға бұрылды. Санкт-Петербургтегі Пулково әуежайы ғана Мәскеуге бет алған 25-тен астам ұшақты қабылдады. Рейстер Қазан, Нижний Новгород, Волгоград, Екатеринбург, Минск және Баку қалаларына да бағытталды.
«Аэрофлот» кейбір рейстердің тоқтатылғанын, басқаларының ұшу уақыты ауыстырылғанын растады. Компанияның айтуынша, басқа әуежайларға бұрылған ұшақтар шектеу алынғаннан кейін сапарын жалғастырады. Алайда экипаждарға демалыс қажет болса, ұшу уақыты тағы шегерілуі мүмкін. Росавиация тасымалдаушыларға рейс ұзақ кешіккенде жолаушыларды тамақпен, сусынмен және қонақүймен қамтамасыз ету міндетін еске салды.
Күндізгі шабуыл түнгі жаппай шабуылдан кейін болды. Собяниннің сөзінше, түнде Мәскеу өңіріне қарай 155 дрон ұшқан. Ресей Қорғаныс министрлігі түнде ел өңірлерінің үстінде 443 дрон жойылғанын мәлімдеді. Мәскеу әуе торабы қазан айында дрон шабуылдарына байланысты бірнеше рет тоқтаған, бірақ бұған дейін шектеулер негізінен түнде енгізілген. Шабуылдар АҚШ делдал болып отырған Украинадағы қақтығысты реттеу жөніндегі келіссөздер жүріп жатқан тұста жалғасып отыр.
