Көкшетауда Зеренді тасжолына шығар жердегі жанармай бекеттерінің бірінен бензин құйған 15 көлік, болжам бойынша, сапасыз отынның салдарынан бұзылды. Көліктер жол үстінде сөніп қалып, кейбір жүргізушілер оларды тастап, қалаға жаяу қайтуға мәжбүр болды. Зардап шеккен көліктердің санын қалалық кәсіпкерлік және ауыл шаруашылығы бөлімі жанармай бекетінің басшылығына сілтеме жасап хабарлады.
Барлық көлік отын жүйесін тазалау үшін техникалық қызмет көрсету станцияларына жіберілді. Жанармай бекетінің атауын және отынды тексеру нәтижесін ведомство хабарлаған жоқ.
Мәселе туралы алғаш болып жүргізушілердің өздері қалалық пабликтерде жазды. Олардың шағымдарын Instagram-дағы жергілікті парақшалардың бірі жариялады.
Қазақстанда бензин сапасына қатысты шағымдар бұрын да айтылған. Тамыз айының соңында Сауда және интеграция министрлігі жүргізушілердің өтініштерінен кейін мұнай өңдеу зауыттарынан жанармай бекеттеріне дейінгі бүкіл жеткізу тізбегін тексерді. Өндіріс алаңдарындағы алғашқы тексерістер заң бұзушылық анықтаған жоқ. Бұған дейін депутат Асхат Рахымжанов отын сапасын бақылауды күшейтуді және жүргізушілерге шығынның өтемақысын алуды жеңілдетуді ұсынған болатын.
