Италияның оңтүстігінде жүк көлігі жүргізушілері бірнеше күн бойы жолдарды жауып тастағандықтан, буйвол сүтінен жасалатын моцарелла, макарон және қызанақ тұздықтары өндірісі тоқтап қалды. Жүргізушілер өткен аптадан бері тас жолдар мен автомагистральдарды бөгеп, үкіметтен дизель отынына жұмсалатын шығынды азайтуды талап етіп отыр. Ең көп зардап шеккен Кампания, Сицилия және Калабрия өңірлерінде отын, азық-түлік және дәрі-дәрмек жеткізу үзіліп қалды.
Негізінен Кампанияда шоғырланған буйвол моцарелласын өндірушілер логистикадағы іркілістерге байланысты жұмысын тоқтатты. Қызанақ тұздықтары мен макарон шығаратын La Doria компаниясы елдің оңтүстігіндегі жеті зауытын жауып, қызметкерлерінің жартысын мәжбүрлі демалысқа жіберді. Компания басшысы Антонио Феррайоли наразылық жалғаса берсе, оңтүстік өңірлердің өнімі бүкіл Италиядағы супермаркет сөрелерінен жоғалып кетуі мүмкін екенін ескертті. Stellantis автоконцерні бөлшектердің тапшылығына байланысты Помильяно-д’Арко, Атесса және Мельфидегі зауыттарын тоқтатты.
Неаполь мэрі Гаэтано Манфредидің айтуынша, қалада отын тапшылығы жедел жәрдем қызметінің жұмысын қиындатып, қоқыс шығаруға қауіп төндірді. Өңірдегі супермаркеттер, жанармай құю бекеттері мен ауруханалар жабдықтаудағы үзілістерге шағымданды.
22 қазанда үкімет қосымша көмек туралы декретті мақұлдады. Оған сәйкес тасымалдаушылар бұрын бөлінген 434 млн еуроға қоса тағы 106 млн еуро салық жеңілдігін алады, фермерлерге 60 млн, балық шаруашылығына 10 млн еуро қарастырылды. Сицилияда жол бөгеттері инфрақұрылым және көлік министрі Маттео Сальвинимен келіссөзден кейін алынды, Калабрияда жүргізушілер наразылықты уақытша тоқтатты. Кампанияда наразылық жалғасып жатыр: түнде полиция Казерта мен Салерно маңында A1 автомагистралінің учаскелерін босатты, ал Неаполь префектурасы 600-ге жуық жүк көлігін тексеруді бастады. Тасымалдаушылардың үкіметпен келесі кездесуі 27 қазанға белгіленді.
Премьер-министр Джорджа Мелони «диалогты таңдап, ереуілдерді тоқтатқан» бірлестіктерге алғыс айтты. Оның сөзінше, наразылық білдірушілердің аз бөлігі әріптестерінің жұмысына кедергі келтіру үшін дөңгелектерді тесіп, күш қолданып жүр. «Бұл наразылық емес, қорқыту. Біз оған жол бермейміз», — деді Мелони. Билік бөгеттерден өтуге тырысқан жүк көліктерін полиция алып жүретінін хабарлады.
Наразылық дизель отыны күрт қымбаттаған тұста басталды. Сонымен қатар Мелони үкіметі көше тәртіпсіздіктеріне қатысқандарға жазаны қатаңдатып жатыр: қазан айында Миландағы бүліктерден кейін Италия наразылық акцияларында күш қолданғаны үшін бес жылға дейін бас бостандығынан айыру жазасын енгізді.
