Қазақстандық бес боксшы 22 қазанда Черногорияның Будва қаласында өтіп жатқан World Boxing U19 әлем чемпионатының 1/8 финалында жеңіске жетіп, ширек финалға шықты. Жарыстың жетінші күні құрама алты жекпе-жек өткізіп, соның бесеуінде жеңді.
Күндізгі сессияда 55 келіге дейінгі салмақта Айдос Үсенов кубалық Айверсон Акостаны төрешілердің бірауызды шешімімен 5:0 есебімен ұтты. Дәл осындай есеппен Ақжүрек Қалабай (65 кг) қырғызстандық Элдияр Тенисбековтен, ал Бибарыс Әшірбай (70 кг) австралиялық Люк Насифтен басым түсті.
Кешкі сессияда 51 келіге дейінгі салмақта Мадира Жұмақан италиялық Коринн Мари Фавиді 5:0 есебімен жеңді. Данияр Ақбисенов (60 кг) түркиялық Фуркан Аварды төрешілердің 3:2 шешімімен ұтты.
80 келіге дейінгі салмақта Тимур Тайбеков ресейлік Прохор Старцевке есе жіберді. Екінші раундта төреші қазақстандық боксшыға үш рет есеп ашты, үшінші нокдауннан кейін жекпе-жек тоқтатылды. Тайбеков үшін чемпионат аяқталды, ал Старцев ширек финалда сайысады.
U19 әлем чемпионаты – 19 жасқа дейінгі боксшылар үшін маусымның басты турнирі. Биылғы жарыс World Boxing ұйымының аясында екінші рет өтіп жатыр: алғашқысы 2024 жылы АҚШ-та ұйымдастырылған. Будваға 69 ұлттық федерациядан 474 боксшы келген, медальдар жасөспірім ұлдар мен қыздар арасында он салмақ дәрежесінен сарапқа салынады. Жартылай финал 25 қазанға белгіленген, турнир 27 қазанда аяқталады.
Бұған дейін Қалабай 1/16 финалда эстониялық Александр Живолупты нокаутқа түсірген, ал Ақбисенов пен Әшірбай 19 қазанда Будвадағы алғашқы жекпе-жектерінде жеңген. Қазақстандықтар ішінен ширек финалға бірінші болып аса ауыр салмақтағы Владислав Саможонов шықты: ол түркиялық қарсыласын нокаутпен ұтқан. Әлем чемпионатына құрама сәтті құрлықтық біріншіліктен кейін келді: шілдеде Джакартада қазақстандықтар U19 Азия чемпионатында бес алтын медаль жеңіп алған.
